O Convento de Novodevichy, tamén coñecido como Mosteiro de Bogoroditse-Smolensky (en ruso: Новоде́вичий монасты́рь, Богоро́дице-Смоле́нский монасты́рь), é probablemente o mosteiro máis coñecido de Moscova. O seu nome, que ás veces se traduce como "Mosteiro das Doncelas Novas", elixiuse para diferencialo do "Mosteiro das Doncelas Vellas" (o Convento da Ascensión) situado dentro do Kremlin de Moscova. O convento fundouse polo gran duque Vasili III o 13 de maio de 1524 na honra da Icona de Smolensk da Nai de Deus, coñecida como «Hodegetria» e principal santuario de Smolensk, en gratitude pola conquista de Smolensk en 1514. A diferenza doutros mosteiros de Moscova, permaneceu practicamente intacto desde o século XVII. En 2004, declarouse Patrimonio da Humanidade da UNESCO.
Estrutura e monumentos thumb|200px|A tsarevna Sofia Alekseyevna no convento de Novodevichy (1879), de Ilya Repin. O convento sitúase na zona suroeste da cidade histórica de Moscova. O recinto do convento está pechado por murallas e rodeado por un parque que constitúe a zona de amortecemento. O parque limita co tecido urbano da cidade polos lados norte e leste. Polo oeste limita co río Moscova e polo sur hai unha autoestrada urbana. Os edificios están rodeados por un alto muro de cachotaría con 12 torres. Os accesos sitúanse no norte (cara á cidade) e no sur. A configuración do recinto do convento é a dun rectángulo irregular que se estende de oeste a leste.
A estrutura máis antiga do convento é a catedral de Smolensk, de seis piares e cinco cúpulas, dedicada á icona da Nosa Señora de Smolensk. Sitúase no centro dos eixes que unen as dúas portas de acceso. Os documentos conservados sitúan a súa construción entre 1524 e 1525, con todo, a súa elevada planta baixa, as súas proporcións maxestosas e o frontón central salientado son característicos das catedrais monásticas construídas por orde de Iván o Terrible. A maioría dos especialistas coinciden en que a catedral reconstruíuse nas décadas de 1550 ou 1560. Antigamente estaba rodeada por catro capelas máis pequenas, nunha disposición que lembra a da Catedral da Anunciación do Kremlin. Os seus frescos figuran entre os mellores de Moscova.
Aínda que a catedral é o elemento central do convento, hai outras moitas igrexas. A maioría datan da década de 1680, cando o convento foi profundamente renovado por iniciativa da rexente Sofía Alekséievna, que máis tarde foi recluída alí. As paredes de cor vermello sangue e as torres rematadas en coroas, dúas elevadas igrexas situadas sobre as portas, o refectorio e as dependencias residenciais deseñáronse no estilo barroco moscovita, presumiblemente por Peter Potapov. Na catedral antiga instaláronse en 1685 unha nova pía de auga bendita e un iconostasio tallado e dourado. Os seus catro niveis inferiores conteñen iconas do século XVI doadas por Boris Godunov, o quinto nivel mostra iconas de destacados pintores do século XVII, Simeon Ushakov e Fiódor Zubov.
Un impresionante e esvelto campanario, tamén encargado pola tsarevna Sofía, construíuse con seis niveis ata acadar unha altura de 72 metros, o que o converteu na estrutura máis alta da Moscova do século XVIII (despois do campanario de Iván o Grande, no Kremlin). Esta lixeira columna octogonal parece unir todos os elementos principais do conxunto nun todo harmonioso.
Declaración como Patrimonio da Humanidade da UNESCO thumb|300px|Vista aérea En 2004, o convento de Novodevichy declarouse Patrimonio da Humanidade da UNESCO. Na avaliación do equipo da UNESCO, afirmouse que o convento é o exemplo máis destacado do chamado "barroco moscovita". Ademais da súa excelente arquitectura e detalles decorativos, o conxunto destaca polos seus valores urbanísticos. O equipo tamén sinalou que o convento é un exemplo sobresaínte dun complexo monástico excepcionalmente ben conservado e que integra a dimensión política e cultural do sitio xa declarado Patrimonio da Humanidade do Kremlin de Moscova. Así mesmo, o convento garda unha estreita relación coa ortodoxia rusa e coa historia de Rusia dos séculos XVI e XVII.
Notas
Referencias
Véxase tamén
Bibliografía Harrison, Peter (2004). Castles of God: Fortified Religious Buildings of the World. Boydell Press. Semler, Helen (1987). Discovering Moscow: Architecture, History, and Art. Hippocrene Books. Outros artigos Patrimonio da Humanidade en Rusia
Ligazóns externas
Evaluation of the convent by UNESCO team Latest photos of Novodevichy Convent and webcam
Categoría:Patrimonio da Humanidade en Rusia