A bandeira argoviana é o estandarte vexilológico que representa o cantón suízo de Argovia, deseñado orixinalmente por Samuel Ringier-Seelmatter en 1803, pouco despois da fundación do cantón. A bandeira divídese verticalmente en dúas partes iguais. No lateral da hasta, presenta un fondo negro cunha franxa branca ondulada no centro, dividida en tres secciones por dúas liñas azuis tamén onduladas; a parte oposta mostra un ton azul claro con tres estrelas brancas de cinco puntas.
Historia En 1798, Argovia foi creada como cantón da República Helvética e, en 1803, a través da lei de mediación; converteuse nun dos seis novos cantóns da Confederación restaurada. Ese mesmo ano, o alcalde suízo Louis d’Affrey solicitou aos cantóns recentemente fundados a creación dun escudo cantonal; Samuel Ringier-Seelmatter, membro da comisión gobernamental de Argovia, presentou o seu deseño, sendo adoptado o 20 de abril de 1803. As versións anteriores do brasón non especificaban dúas cotas azuis, e a bandeira a miúdo representaba coa banda ondulada branca dividida en catro partes por finas liñas onduladas negras. Houbo varias interpretacións ata principios do século XX, o deseño actual de dous arriba e un debaixo foi establecido por lei en 1930, e as estrelas foron especificadas como de cinco puntas.
Simboloxía O significado das cores non se explicou con máis detalle cando se introduciu en 1803. Fontes do século XIX informan unanimemente que o campo negro da dereita representa a Argovia bernesa, a través do cal discorre o Aare, e as tres estrelas do campo esquerdo representan as tres partes da Argovia oriental. Ademais, engadíronse interpretacións parcialmente populares no século XX, incluíndo informes de que as tres liñas onduladas representaban os tres ríos da rexión, Aare, Limmat e Reuss; que as tres estrelas para as tres confesións, a reformista, a católica e a xudía; ou que as cores negro e azul representan terra fértil e abundancia de auga, respectivamente.
Notas
Categoría:Bandeiras de Suíza Categoría:Bandeiras introducidas en 1803