El Partíu Comunista Obreru Español foi un partíu políticu español, xebráu del PSOE dempués de la decisión del III Congresu Estraordinariu de 1920, pola que'l PSOE s'amestó a la Segunda Internacional y Media y refugó les 21 condiciones d'amiestu nel Komintern. El seutor minoritariu, partidariu d'amestase a l'Internacional Comunista (Komintern), decidió xebrase del PSOE pa entamar el Partíu Comunista Obreru Español, amestáu a la III Internacional. D'esta miente, el PCOE yera la segunda organización española amestada a la Komintern, xunto col Partíu Comunista Español, xebráu l'añu anterior del PSOE.
Hestoria
El 9 d'abril de 1921 el PSOE resolvió nun congresu el so alloñamientu de la III Internacional y provocó la marcha de terceristes, que procedieron col entame del PCOE, que foi efeutivu el 13 d'abril de 1921, cuando estos manifestaron la so voluntá d'amestase pela so cuenta a l'Internacional Comunista. Ente les persones que roblaben esti manifiestu, lleíu por Óscar Pérez Solís declaróse una comisión organizadora, formada por Virgina González Polo, Daniel Anguiano,Eduardo Torralba Beci, Manuel Niñez Arenas, Luis Mancebo y Evaristo Gil. Un congresu estraordinariu de les Mocedaes Socialistes d'España fecho ente los díes 16 y 20 d'abril supunxo la xunión d'estes al partíu pa formar la mocedá del PCOE.
Gerald H. Meaker señala que al partíu falto-y el "talentu y carisma" internu necesariu pa movilizar a les mases con éxitu, anque tamién menta dos eventos, l'asesinatu d'Eduardo Dato y el Desastre d'Annual como socesos que dificultaron la consolidación del partíu.
El partíu entamó a espublizar La Guerra Social, una revista editada por Torralba Beci.
En payares de 1921, na nomada «Conferencia de fusión» fecha ente los díes 7 y 14 de payares, el PCOE y el Partíu Comunista Español, influyenciaos poles presiones de l'Internacional Comunista, fusionáronse nel Partíu Comunista d'España (PCE), que se convirtio nel únicu referente tercerista n'España. Les mocedaes de dambos partíos, dambes provenientes de les mocedaes socialistes, entamaron tamién un procesu de fusión qu'acabó cola creación de la Xunión de Mocedaes Comunistes d'España
Referencies
Enllaces esternos
Categoría:Partíos políticos desapaecíos d'España Categoría:1921