Infiesto ye una película española de suspensu de 2023 escrita y dirixida por Patxi Amezcua y protagonizada por Isak Ferriz ya Iria del Río. Estrenóse en Netflix el 3 de febreru de 2023.
Argumentu Una rapaza, Saioa, ye atopada caminando per una carretera rural n'Asturies, puerca y ferida. Esbarrúmbase nun aparcamientu y ye identificada como una persona desapaecía que fora reportada trés meses enantes. Col país nes primeres etapes del confinamientu pola COVID-19, los axentes de la Policía Nacional , l'inspeutor Samuel García y la subinspeutora Marta Castro, son asignaos al casu, trabayando con un sofitu mínimu por cuenta de la pandemia.
La madre de Saioa, Julie, ye avisada y llega al hospital, u la so fía permanez inconsciente. Nel momentu del secuestru, les sospeches recayeren sobro'l padrastru de Saioa, quien dexara a Julie'l día enantes de la desapaición de la rapaza. García y Capo entruguen al padrastru, pero nun atopen nueva información, yá que yá fora investigáu a xeitu.
Cuando Saioa recupera la conciencia, la so terapeuta, Paz, llinda los interrogatorios debíu al fráxil estáu de la moza. La única pista provien d'un conductor qu'afirmó haber vistu a una moza nun encruz rural. Los deteutives investiguen el llugar y afayen un edificiu abandonáu onde atopen a una moza y a un home que fuxe al velos. García llogra algamalo, pero dambos resulten ser hippies que cultiven mariguana. Son puestos en llibertá al nun tener nenguna relación col casu.
La investigación da un xiru cuando otra muyer denuncia un intentu de secuestru per parte d'un delincuente conocíu como “El Mataperros”, que vive cerca l'encruz. Los deteutives aporten a la propiedá, u paez nun haber naide. Nun establu atopen una cama improvisada. El Mataperros apaez y esplica que la cama pertenez al so primu, con quien suel salir a cazar. Los deteutives cólense, pero llueu alcuentren que na ropa de Saioa había sable utilizada na ellaboración de vinu, posiblemente coincidente cola d'unes pipes atopaes nel mesmu establu. Tornen a la casa del Mataperros y ven que fuxó en matando al so propiu perru. Nel establu atopen una habitación oculta con pruebes clares de cautiveriu.
Un control policial apara al Mataperros, pero esti suicídase, declarando: “Esto ye solo'l principiu” Los deteutives centren entós la so investigación nel so primu, el supuestu compañeru de caza. El primu revela que'l Mataperros en realidá salía de caza con un amigu nomáu “El Demoniu”, un home con graves problemes psicolóxicos. Na caravana del Demoniu, Capo y García escapen por pocu d'una esplosión provocada por una trampa. Ellí atopen semeyes de moces con túniques blanques, lo que suxere un patrón de secuestros cada trés meses.
L'hermanu del Demoniu resulta ser el padrastru de Saioa. So presión, revela la esistencia d'un edificiu abandonáu que'l Demoniu utiliza. Nun tirotéu en dichu llugar, el Demoniu ye prindáu. Él tamién repite que “esto ye solo el principiu” y confiesa que pertenez a una secta lliderada por “el Profeta”, dedicada al cultu al dios celta Taranis, qu'esixe sacrificios humanos trimestrales. Saioa confirma la participación d'una tercer persona.
Suspendíu de les sos funciones por emplegar fuecia escesiva escontra'l Demoniu, García repara nuna vieya fotografía a un director de campamentu que lleva una moñeca de paya celta y sospecha que podría ser el Profeta. Pide aida al deteutive llariegu Ramos, quien s'ufierta a llevalo a l'antigua casa'l Profeta. Coles mesmes, Capo alcuentra una conexón ente la marca atopada en Saioa y un paciente d'un hospital psiquiátricu. Ellí, una exintegrante de la secta, Lidia Vega, revéla-y que Ramos ye'l verdaderu Profeta.
García, que yá sospechaba de Ramos, ye atacáu y tirotiáu por él, quien llogra fuxir. Capo y otros axentes lleguen demasiao tarde, pero siguen una pista hasta una mina abandonada. Guiada por una corazonada, Capo baxa a la mina , enfréntase a Ramos y mátalu tres un curtiu intercambiu de disparos. Enantes de morrer, el Profeta tamién proclama que “esti ye l'entamu la fin del mundu”.
La película conclúi con Castro nel hospital al pie del so prometíu, que se recupera, mientres les noticies informen del aumentu d'andades por COVID-19, suxuriendo que les pallabres del Profeta y de los sos siguidores podríen tener un ecu esmolecedor.
Repartu
Isak Ferriz como Samuel Iria del Río como Capo Juan Fernández como'l Comisariu Basterra Ismael Fristchi como Mataperros Isabel Naveira como Paz Nogueira Ana Villa como Julia María Mera como Lidia Vega José Manuel Poga como Marquina "El Demoniu" Luis Zahera como Marquina
Producción En payares de 2021, anuncióse que Vaca Films y Netflix dieren entamu al rodaxe de la película Infiesto en Xixón, Asturies. La película foi escrita y dirixida por Patxi Amezcua, siendo'l so primer proyeutu como direutor en 10 años, dempués de 25 kilates en 2009 y Séptimu en 2013. Pal rodaxe tamién s'emplegaron otres llocalizaciones de Galicia, como l'Hospital San Rafael o la ermita de San Amaro.
Llanzamientu El 17 de xineru de 2023, Netflix amosó'l tráiler y programó'l so estrenu pal 3 de febreru de 2023.
Referencies
Enllaces esternos
Sitio web oficial Infiesto n'Internet Movie Database Infiesto en FilmAffinity
Categoría:Películes d'España Categoría:Películes en castellanu