El programa espacial chinu ye'l conxuntu d'actividaes espaciales desarrollaes pola República Popular China, incluyendo'l desenvolvimientu de vehículos de llanzamientu, satélites artificiales, sistemes de navegación y observación terrestre, vuelu espacial tripuláu, ciencia espacial, infraestructura terrestre y esploración de la Lluna, Marte y otros cuerpos del Sistema Solar.
Los oríxenes del programa remóntense a la década de 1950. El 24 d'abril de 1970, China convirtióse nel quintu país del mundu en poner de forma independiente un satélite n'órbita col Dong Fang Hong 1. En 2003, el vuelu de Yang Liwei na Shenzhou 5 convirtió al país nel terceru, dempués de la Xunión Soviética y los Estaos Xuníos, capaz d'unviar seres humanos al espaciu de manera independiente.
A partir del sieglu XXI, el programa amplió notablemente les sos capacidaes cola creación del sistema mundial de navegación BeiDou, la construcción de la Estación espacial Tiangong, el desenvolvimientu de nuevos cohetes de la familia Llarga Marcha, la esploración robótica de la Lluna y Marte y l'apaición d'un sector espacial comercial.
Ente los principales llogros del programa tán el primer allunizaxe suave na cara oculta de la Lluna, realizáu pola Chang'e 4 en 2019; la devolución de muestres lunares poles Chang'e 5 y Chang'e 6; l'aterrizaxe en Marte de Tianwen-1 y del astromóvil Zhurong en 2021; y la construcción de Tiangong ente 2021 y 2022.
Historia
Oríxenes
El desenvolvimientu de tecnoloxíes de cohetería na República Popular China empezó na década de 1950. En 1956 creóse'l Quintu Institutu d'Investigación del Ministeriu de Defensa Nacional, dedicáu al desenvolvimientu de misiles y cohetes, con Qian Xuesen ente les figures principales del primer programa aeroespacial chinu.
En febreru de 1960, China llanzó'l cohete sonda experimental T-7M, qu'algamó aproximao ocho quilómetros d'altor.
El 24 d'abril de 1970, un cohete Llarga Marcha 1 puso n'órbita'l Dong Fang Hong 1, primer satélite artificial chinu. China convirtióse asina nel quintu país con capacidá independiente pa colocar un satélite n'órbita, dempués de la Xunión Soviética, Estaos Xuníos, Francia y Xapón.
Nos años siguientes desenvolviéronse satélites recuperables, sistemes de comunicaciones y observación terrestre y nuevos vehículos de la familia Llarga Marcha.
Desenvolvimientu del vuelu tripuláu
En 1992 aprobóse formalmente'l Programa Espacial Tripuláu de China, conocíu tamién como Proyeutu 921. Establecióse una estratexa en tres fases: realizar vuelos tripulaos independientes, desenvolver tecnoloxíes d'encuentru y acoplamientu orbital y construir finalmente una estación espacial permanentemente tripulada.
La Shenzhou 1, primera nave de la serie Shenzhou, foi llanzada ensin tripulación en 1999. Tres otros vuelos de prueba, Shenzhou 5 llevó a Yang Liwei al espaciu'l 15 d'ochobre de 2003.
En 2008, durante la misión Shenzhou 7, Zhai Zhigang realizó la primer actividá extravehicular china. Posteriormente desenvolviéronse les maniobres d'encuentru, acoplamientu y suministru orbital necesaries pa la construcción d'una estación espacial.
Esploración llunar y planetaria
El Programa chinu d'esploración llunar empezó operacionalmente cola Chang'e 1, llanzada en 2007. La primer estratexa del programa organizóse en tres fases: orbitar la Lluna, aterrizar na superficie y devolver muestres a la Tierra.
Chang'e 3 realizó'l primer allunizaxe suave chinu en 2013. Chang'e 4 consiguió en 2019 el primer allunizaxe suave de la historia na cara oculta de la Lluna, ente que Chang'e 5 devolvió muestres lunares a la Tierra en 2020.
En 2021, Tianwen-1 convirtió a China nel segundu país que consiguió operar con ésitu un vehículo móvil na superficie de Marte, col astromóvil Zhurong.
Construcción de Tiangong
China llanzó los llaboratorios orbitales Tiangong 1 en 2011 y Tiangong 2 en 2016 como precursores de la futura estación espacial.
La construcción de la Estación espacial Tiangong empezó en 2021 col llanzamientu del módulu central Tianhe. Los módulos Wentian y Mengtian incorporáronse en 2022, completando la configuración básica de la estación.
Organización
El programa espacial chinu nun ta centralizáu nuna única organización comparable a la NASA d'Estaos Xuníos, sinón que les competencies tán repartíes ente distintos organismos estatales, militares, empresariales y científicos.
La Axencia Espacial Nacional China (CNSA) ye l'organismu gubernamental responsable de la xestión de les actividaes espaciales civiles y de la cooperación espacial internacional. Ente les sos funciones tán formular polítiques y planes de desenvolvimientu, organizar grandes programes espaciales, supervisar proyeutos científicos civiles y representar al Gobiernu chinu en materia de cooperación internacional.
El Programa Espacial Tripuláu de China ta xestionáu separadamente pola China Manned Space Agency (CMSA).
Una parte fundamental del diseñu y fabricación de vehículos espaciales y cohetes correspuende a grandes corporaciones estatales, especialmente la China Aerospace Science and Technology Corporation (CASC) y la China Aerospace Science and Industry Corporation (CASIC).
Dende la década de 2010 desarrollóse amás un sector comercial con empreses dedicaes a cohetes, satélites, observación terrestre, telecomunicaciones y otros servicios espaciales.
Sistema de tresporte espacial
Cohetes Llarga Marcha
La familia Llarga Marcha constitúi la base histórica del sistema de tresporte espacial chinu. El nome inclúi numberoses families de vehículos con capacidaes distintes.
Ente los principales modelos modernos tán:
Llarga Marcha 2, utilizáu en diverses configuraciones pa misiones orbitales y, na variante 2F, pal llanzamientu de naves Shenzhou; Llarga Marcha 3, emplegáu principalmente pa órbites altes y misiones interplanetaries; Llarga Marcha 4, destináu principalmente a satélites en órbita terrestre; Llarga Marcha 5, el principal llanzador pesáu operativu chinu; Llarga Marcha 6, familia de llanzadores de nueva xeneración; Llarga Marcha 7, utilizáu ente otres funciones pal llanzamientu de les naves de carga Tianzhou; Llarga Marcha 8, diseñáu especialmente pa misiones comerciales y llanzamientos múltiples; Llarga Marcha 11, cohete de combustible sólido capaz de realizar tamién llanzamientos marítimos; y Llarga Marcha 12, que realizó'l so primer vuelu en 2024.
El Llarga Marcha 5 puede colocar alredor de 25 tonelaes n'órbita terrestre baxa y unes 14 tonelaes n'órbita de tresferencia xeostacionaria.
Cohetes comerciales
El desenvolvimientu del sector espacial comercial dio llugar a nuevos vehículos fabricaos por empreses estatales y privaes. Ente ellos tán les families Kuaizhou, Ceres-1, Hyperbola-1 y otros llanzadores.
El Gobiernu chinu incluyó'l desenvolvimientu del espaciu comercial ente les árees estratéxiques de crecimientu industrial. En 2026, la CNSA y l'Administración Estatal pa la Regulación del Mercáu publicaron un sistema específicu d'estándares pal sector espacial comercial.
Reutilización
China desenvolvió programes d'investigación sobre sistemes de tresporte espacial reutilizables, incluyendo prototipos de cohetes de despegue vertical y aterrizaxe vertical y vehículos espaciales reutilizables.
El llibru blancu espacial de 2021 estableció como oxetivu investigar tecnoloxíes fundamentales de sistemes reutilizables y realizar vuelos de prueba.
Llarga Marcha 10
El Llarga Marcha 10 ta en desenvolvimientu principalmente pal programa chinu d'esploración llunar tripulada. Va utilizar variantes distintes pa vuelos hacia la Lluna y pa misiones tripulaes n'órbita terrestre baxa.
El cohete forma parte del sistema diseñáu pa permitir un allunizaxe tripuláu chinu enantes de 2030.
Bases de llanzamientu
China dispón de cuatro grandes centros estatales de llanzamientu espacial:
Centru de Llanzamientu de Satélites de Jiuquan, nel noroeste del país, principal base histórica de les misiones tripulaes; Centru de Llanzamientu de Satélites de Taiyuan, especializáu principalmente en misiones hacia órbites polares y heliosíncrones; Centru de Llanzamientu de Satélites de Xichang, emplegáu principalmente pa satélites xeostacionarios y delles misiones interplanetaries; Centru de Llanzamientu Espacial de Wenchang, na islla de Hainan, dende onde operen los grandes cohetes de nueva xeneración, incluyendo Llarga Marcha 5 y Llarga Marcha 7.
A estes instalaciones sumóse'l Centru Internacional de Llanzamientu Aeroespacial Comercial de Hainan, primera base china construyida específicamente pa misiones espaciales comerciales. Realizó'l so primer llanzamientu'l 30 de payares de 2024, col vuelu inaugural del Llarga Marcha 12.
China desenvolvió tamién capacidá pa realizar llanzamientos marítimos.
Satélites artificiales
Los satélites constitúin una de les partes principales del programa espacial chinu. El país desenvolvió sistemes de comunicaciones, meteoroloxía, navegación, observación terrestre, teledetección, investigación científica y demostración tecnolóxica.
Observación terrestre
China opera numberoses families de satélites d'observación de la Tierra. El Sistema Chinu d'Observación Terrestre d'Alta Resolución foi desarrolláu pa proporcionar observaciones con alta resolución espacial, temporal y espectral.
Ente les principales families de satélites d'observación y meteoroloxía tán Gaofen, Fengyun, Haiyang y Ziyuan.
Los datos obteníos utilícense en meteoroloxía, cartografía, agricultura, xestión ambiental, recursos naturales, prevención de catástrofes y otros ámbitos civiles.
Comunicaciones
China desenvolvió sistemes de satélites de comunicaciones xeostacionarios, comunicaciones móviles y retransmisión de datos.
Los satélites Tianlian formen un sistema de retransmisión de datos espaciales que facilita les comunicaciones con naves Shenzhou, la estación Tiangong y otros vehículos orbitales.
El programa inclúi tamién el desenvolvimientu de constelaciones de comunicaciones en órbita terrestre baxa.
BeiDou
El BeiDou ye'l sistema chinu de navegación por satélite. Desenvolvióse en tres fases sucesives hasta la creación d'un sistema de cobertoria mundial.
La constelación BeiDou-3, formada por 30 satélites na configuración inicial del sistema, completóse en 2020. Proporciona servicios de posicionamientu, navegación y sincronización temporal, amás de comunicaciones por mensaxes curtios, busca y salvamentu y servicios d'aumentación.
China investiga una nueva xeneración del sistema BeiDou y la integración de navegación, comunicaciones y constelaciones d'órbita baxa nun sistema nacional más ampliu de posicionamientu, navegación y sincronización.
Ciencia espacial
El programa espacial chinu inclúi satélites científicos dedicaos a astronomía, física de partícules, física solar, gravitación y otros campos.
Ente les principales misiones científiques tán:
DAMPE, destinada al estudiu de materia escuro y rayos cósmicos; Hard X-ray Modulation Telescope, observatoriu de rayos X; Einstein Probe, dedicáu a fenómenos transitorios de rayos X; SVOM, misión sino-francesa dedicada al estudiu de los estallíos de rayos gamma; y diversos satélites dedicaos a física cuántica, observación solar y estudiu del campu gravitatoriu.
La Estación espacial Tiangong funciona tamién como plataforma pa esperimentos de física, bioloxía, medicina espacial, ciencia de materiales y microgravedá.
Xuntian
Xuntian ye un telescopiu espacial de gran campu concebíu pa operar nuna órbita próxima a la estación Tiangong. La so arquitectura permite que pueda acoplase periódicamente a la estación pa operaciones de mantenimientu.
El so llanzamientu ta previstu pa 2027.
Programa espacial tripuláu
El Programa Espacial Tripuláu de China empezó oficialmente en 1992.
Shenzhou
Shenzhou ye la familia de naves espaciales tripulaes utilizada dende finales de la década de 1990.