_ Asturxules ye un proyectu entamáu en xunetu de 2025 por Elena Álvarez Rodríguez y Marina García Rodríguez pensáu pal espardimientu de la llingua asturiana nes redes sociales.
Estes dos amigues, graduaes en Filoloxía Hispánica y especialistes en Filoloxía Asturiana, suben na so cuenta, @asturxules, conteníos n'asturianu pensaos sobre manera pa llegar a la mocedá. Cuestiones filolóxiques, vidios sobre la cultura y historia asturiana, entrevistes a artistes de dientro y fuera d'Asturies, difusión d'eventos, vida diaria... son dalgunos de los conteníos que se puen atopar nel so perfil, presente n'Instagram, Facebook, TikTok y YouTube.
D'esti proyectu naz tamién el programa de radio Nun me chisques, producíu por Amarok Media y emitíu na Radio del Principáu d'Asturies.
Biografía Dambes amigues trabayaron xuntes nel Serviciu de Normalización Llingüística de Xixón, nel qu'entamaron a facer videos previo a la creación d'Asturxules. Anguaño, compaxinen el proyectu d'Asturxules coles práctiques del Máster de Formación del Profesoráu que cursaron xuntes nel cursu 2024-2025.
Amás d'estudiar filoloxía, Elena (Uviéu, 2000) fizo un Máster en Llingüística Teórica y Esperimental na Universidá de País Vascu y ta faciendo la tesis doctoral na Universidá d'Uviéu, mientres que Marina (Xixón, 2002) ta cursando'l Máster en Lliteratures Hispániques (catalana, gallega y vasca) nel contestu européu pela UNED.
Trayectoria Más allá de les redes sociales, el percorríu d'Asturxules ye mui variáu. Participaron nel 2025 como ponentes nel Festillingües n'Avilés y nel I Congrés Internacional sobre Comunicació, Tecnologia i Llengües Minoritàries na Val d'Arán. Presentaron el Conciertu Pola Oficialidá nos Almacenes Kuivi esti mesmu añu y collaboraron nel XII Día de la Reciella nel Muséu del Pueblu Asturies. De forma voluntaria, dieron charres en dellos institutos d'Asturies. Y, en 2026, collaboraron col Muséu Tito Bustillo na ufierta d'un taller pa nenes y nenos; presentaron los premios 'Culturaquí' del Instituto Asturiano de Juventud y la gala final de 'Los alcuentros de la mocedá cola llingua' entamaos pola Oficina de Normalización Llingüística de Xixón.
Referencies
Enllaces esternos
Asturxules nel programa de radio Nun me chisques de la Radiotelevisión del Principáu d'Asturies.
Categoría:Idioma asturianu