Octavia Hill foi una reformadora social inglesa y fundadora del National Trust. La so principal preocupación yera'l bientar de los habitantes de les ciudaes, especialmente de Londres, na segunda metá del sieglu XIX. Nacida nuna familia de pensadores radicales y reformadores con un fuerte compromisu cola llucha contra la probeza, ella mesma crióse en circunstancies estreches pola ruina financiera de los negocios del so padre. Educada en casa pola so madre, trabayó dende los 14 años pol bientar de la xente trabayadora.
Hill foi una promotora del desenvolvimientu de la vivienda social, y la so temprana amistá con John Ruskin permitió-y poner en práutica les sos teoríes col apoyu de la inversión inicial d'él. Creía na autosuficiencia, y fizo d'ello una parte clave del so sistema de vivienda: ella y los sos asistentes conocíen personalmente a los inquilinos y animábense a meyorar. Oponíase a la provisión municipal de vivienda, creyéndola burocrática y impersonal.
Otra de les preocupaciones de Hill yera la disponibilidá d'espacios abiertos pa la xente probe. Fixo campañes contra'l desarrollu en zones de monte suburbanu y ayudó a salvar Hampstead Heath y Parliament Hill Fields en Londres de la construcción. Foi una de les trés fundadores del National Trust, creáu pa caltener llugares d'interés históricu o de guapura natural pal disfrute del públicu británicu. Foi miembru fundadora de la Sociedá d'Organización Caritativa (anguaño la ONG Family Action), qu'organizaba actos benéficos y entamó un serviciu de visites a domicilios que formó la base del trabayu social modernu. Foi miembru de la Comisión Real sobre les Lleis de Probeza en 1905.
L'heriedu de Hill inclúi les grandes propiedaes del actual National Trust, dellos proyectos de vivienda qu'entá se xestionen coles sos llinies, una tradición de formación pa xestores de vivienda y la casa natal d'Octavia Hill establecida pola Octavia Hill Society nel so llugar natal en Wisbech. Foi clave nel sofitu pa la creación de lo que güei se conoz como la Fuercia de Cadetes del Exércitu, tres ver l'éxitu que tenía nes escueles que manteníen destacamentos del Officers' Training Corps (anguaño conocíu como Combined Cadet Force).
Referencies
Enllaces esternos