Hilda Farfante ye una maestra asturiana, activista pola recuperación de la memoria histórica.
Trayectoria Nació en Bisuyu, una parroquia de Cangas del Narcea. Yera fía de Balbina Gayo, maestra y directora de la escuela de Cangas, y de Ceferino Farfante, maestru miembru de les misiones pedagóxiques que llevaben la cultura a les zones rurales. Dambos, maestros allegaos a la causa republicana, fueron fusilaos el 8 de setiembre de 1936 por una columna de requetés de Galicia que sofitaben al bandu franquista. A la so madre soterráronla nuna cuneta, y al so padre, al qu'atraparon cuando esti foi a intentar a salvar a la so muyer, refundiáron-y por un ribayu al acabar el día.
Énte l'amenaza de los asesinos de querer acabar con tola familia, el so güelu y el so tíu fuxeron a los montes de Ponticiella con Hilda Farfante, de cinco años, y los sos dos hermanes, de 7 y 4. Darréu, dixebraron a les hermanes y Hilda Farfante foi vivir cola so tía en Bual cola tamién maestra Guillermina.
Con nueve años, Farfante yá ayudaba a Guillermina nes sos clases. Dempués, estudió pedagoxía y convirtióse en maestra y directora d'escuela. Mientres la dictadura franquista, Farfante vivió col mieu a les represalies. Yá na democracia, dedicóse a la recuperación de la memoria histórica y a buscar los restos mortales de los sos padres.
En 1984, con fondos propios de la so familia, realizóse una cata na zona de Veigairréi onde se pensaba que podríen tar los sos padres, anque ensin ésitu. En 2020, mientres la redacción de la Llei de Memoria Histórica d'España, Farfante unvió-y una carta al presidente del Gobiernu Pedro Sánchez con propuestes concretes pa poder alcontrar a les persones sumíes mientres la guerra civil española y el franquismu, ya incluyó un pidimientu personal coles indicaciones de los llugares nos que pensaba que los sos padres podríen tar soterraos. Tres l'aprobación de la llei en 2021, el Gobiernu del Principáu d'Asturies realizó otra busca, anque tampoco toparon los cadabres de Balbina y Ceferino.
Reconocencies En 2013, Pilar López Solanu recoyó'l testimoniu de Farfante nel documental Las maestras de la República, ganador del Premiu Goya al meyor documental. En 2017, l'Asociación Trece Roses d'Asturies concedió a Farfante'l so premiu añal pol so llabor na recuperación de la memoria histórica. Esi mesmu añu, foi reconocida col Premiu a les Llibertaes Rafael del Riego, impulsáu polos conceyos de Tinéu, n'Asturies, y Las Cabezas de San Juan, en Sevilla.
Referencies
Enllaces esternos
Categoría:Profesores d'Asturies Categoría:Persones de Cangas del Narcea