Valeria Castro ye una desarrolladora y productora de videoxuegos.
Trayectoria profesional Nacida n'Uruguái y criada n'Elx, Alicante (España), dende temprana edá foi una apasionada de los videoxuegos. En llicenciándose en Publicidá y especializase en diseñu gráficu ya ilustración, camudó a Colonia (Alemaña) para trabayar como diseñadora UI/UX, trabayu que más palantre-y daría la oportunidá de trabayar en Beixín (China) como Lead Designer.
Con 24 años volvió a España ya instalóse en Madrid para cursar un Máster d'Informática gráfica, xuegos y realidá virtual, estudios que compaxinó col so trabayu como productora en Bitoon Games, una de les empreses de videoxuegos más grandes d'España. En supervisando a un equipu de desenvolvimientu 100% masculín, decide, a los 26 años, crear la so propia empresa.
En 2015 fundó Platonic Games, coles mires de faer xuegos para móviles, con una estética kawaii, y más diversos y accesibles. Platonic Games, con sede en Madrid, convirtióse nuno de los estudios indie más grandes d'España, con un equipu diversu, y con una mayoría de muyeres en plantía. En 2016 aceptó un puestu como profesora de Producción na Universidá de Tecnoloxía y Arte Dixital.
Los sos xuegos fueron galardonaos por grandes empreses como Google y Apple, gracies a lo cual foi ponente y convidada n'eventos y conferencies internacionales entamaos por Women in Games y Google Play Games. La revista nacional DeVuego nombrola Diseñadora del Añu 2017 como reconocencia pol so trabayu nel títulu 'Symmetry'. La revista Mujeres a Siguir nominóla en 2018 na categoría de Tecnoloxía.
En 2019 foi escoyida presidenta de DEV, asociación d'empreses desarrolladoras de videoxuegos tantu españoles como internacionales con sede n'España.
Reconocencies
En 2017, meyor diseñadora. En 2018, premiu MAS en tecnoloxía.
Referencies
Enllaces esternos
Categoría:Informáticos ya informátiques d'España Categoría:Desarrolladores de videoxuegos Categoría:Persones de Montevidéu