Geirangerfjorden en noruegués ou fiorde Geiranger é un fiorde na rexión de Sunnmøre, no condado de Møre og Romsdal, Noruega. Atópase integramente no municipio de Stranda. É unha ramificación de 15 km do Sunnylvsfjorden, que á súa vez é unha ramificación do Storfjorden (literalmente Gran Fiorde). A pequena localidade de Geiranger sitúase ao fondo do fiorde, onde desemboca o río Geirangelva.
O fiorde O fiorde é un dos lugares turísticos máis visitados de Noruega. En 2005, declarouse Patrimonio da Humanidade pola UNESCO, conxuntamente co Nærøyfjorden, baixo a denominación de «Fiordes do oeste de Noruega». Esta condición viuse ameazada polos controvertidos plans de construír liñas eléctricas que atravesasen o fiorde.
O transbordador Geiranger–Hellesylt, que transporta vehículos e ofrece á vez unha travesía turística, está operado pola compañía Fjord1 Nordvestlandske. Realiza o traxecto ao longo do fiorde, conectando as localidades de Geiranger e Hellesylt. Está previsto que, a partir de 2026, se esixa o uso de barcos de cero emisións no fiorde.
Ao longo das beiras do fiorde atópanse varias granxas hoxe abandonadas. A asociación *Storfjordens venner* levou a cabo algúns traballos de restauración. As máis visitadas son Skageflå, Knivsflå e Blomberg. Pódese chegar a pé a Skageflå desde Geiranger, mentres que para as outras é necesaria unha excursión en barco. O fiorde tamén alberga varias fervenzas, como a das Sete Irmás.
Magdalene Thoresen, a sogra de Henrik Ibsen, dixo o seguinte sobre a zona: Este fiorde está rodeado por algunhas das montañas máis escarpadas de toda a costa occidental. É moi estreito e non ten zonas habitables na beira, xa que as alturas precipitosas elévanse en estratos abruptos e escarpados case directamente desde a auga. Fervenzas escumosas precipítanse cara ao fiorde desde picos dentados. Con todo, hai algunhas granxas de montaña, unha ou dúas delas teñen un acceso tan perigoso, a través de sendeiros que serpentean por precipicios escarpados e pontes fixadas á montaña con parafusos e aneis de ferro, que dan testemuño, dun xeito moi rechamante, da extraordinaria capacidade de invención que os desafíos da natureza desenvolveron no ser humano.History about Bringe-Ragnhild.
Fervenzas As dúas fervenzas máis salientables do fiorde son as Sete Irmás e o Pretendente (Friaren). Ambas as fervenzas sitúanse unha fronte á outra a través do fiorde, dise que o Pretendente intenta cortexar as irmás que ten en fronte.
O Veo da Noiva é outra fervenza do fiorde, recibe este nome porque cae con delicadeza sobre un bordo rochoso e, ao verse a contraluz do sol, semella un veo fino que cobre as rochas.
Desprendementos de rochas O fiorde está ameazado de xeito constante pola montaña Åkerneset, que está a piques de derrubarse sobre as augas. Un derrubamento provocaría un megatsunami que alcanzaría varias localidades próximas, incluídas Geiranger e Hellesylt, nun prazo duns dez minutos.
Na cultura popular A película de 2015 The Wave (Bølgen) baséase na premisa dun desprendemento de rochas da montaña Åkerneset que asolaga a localidade de Geiranger. Frozen (2013) utilizou as paisaxes do Geirangerfjord e do Nærøyfjord como base para as paisaxes de Arendelle.
Galería
Notas
Referencias
Véxase tamén
Outros artigos Patrimonio da Humanidade en Noruega
Ligazóns externas Geiranger Tourist-Info Destination Geirangerfjord – Ålesund & Sunnmøre Geirangerfjord – the official travel guide to Norway Travel information
Categoría:Patrimonio da Humanidade en Noruega