Guillermo Fernández Romo, nado en Madrid o 23 de novembro de 1978, é un adestrador de fútbol español. Actualmente dirixe o Racing Club de Ferrol da Primeira Federación.
Traxectoria Comezou a súa carreira profesional en 1997 como profesor na Escola Municipal de Fútbol de Aluche. Posteriormente traballou nas categorías inferiores de varios equipos locais: Villaverde Boetticher, Colonia Moscardó e CF Pozuelo de Alarcón. Entre 2000 e 2001 tivo a súa primeira experiencia como adestrador sénior, dirixindo o CD Racing Garvin nas categorías rexionais madrileñas. Tras adestrar os conxuntos xuvenís do CD Aviación e do CD Móstoles, no ano 2003 comezou a dirixir a Escola Deportiva Moratalaz.
En 2005, tras traballar no equipo técnico da Unión Deportiva Vecindario, Fernández foi contratado como adestrador do Las Rozas CF da Terceira División. Posteriormente regresou ás categorías xuvenís, primeiro no Rayo Majadahonda e despois no Pontevedra Club de Fútbol. En 2008 traballou durante un breve período de tempo coma segundo adestrador do Pontevedra B. Entre 2008 e 2010 adestrou o xuvenil do Celta de Vigo na División de Honra, conseguindo un título de liga.
No ano 2010 foi nomeado adestrador do SD Noja. En 2011 foi contratado como asistente de Óscar Cano no Melilla. Tras a saída de Cano en xuño de 2012, comezou a dirixir o Villalonga Club de Fútbol. Posteriormente volveu traballar como asistente de Cano, primeiro no Betis B e despois no CD Alcoyano.
En xullo de 2015, Guillermo Fernández comezou a adestrar o Olímpic de Xàtiva na Segunda División B. Tras ser destituído en febreiro de 2016, foi contratado como secretario técnico do Real Murcia en xuño dese ano. Entre xaneiro e xuño de 2017 adestrou o Sabadell. Posteriormente uniuse ao FC Jumilla, primeiro como director deportivo e despois como adestrador, contribuíndo á permanencia do equipo na Segunda División B.
O 22 de maio de 2018, Fernández foi contratado como coordinador das seccións inferiores do Racing de Santander. En agosto dese mesmo ano pasou a dirixir o SD Ejea. En xuño de 2019 comezou a adestrar o UE Cornellà. Deixou o equipo en maio de 2021 e regresou ao Racing de Santander para dirixir o primeiro equipo na Primeira División RFEF. Na súa primeira tempada alcanzou o regreso do club cántabro á Segunda División.
O 12 de decembro de 2022, tras cinco derrotas consecutivas, Fernández foi destituído como adestrador do Racing. En xuño de 2023 foi contratado para dirixir o UD Ibiza, recén descendido á Primeira Federación. Marchou do club en abril de 2024. Entre xaneiro e xuño de 2025 foi adestrador do FC Cartagena. Despois de 7 meses sen equipo, en xaneiro de 2026 foi anunciado como novo adestrador do Racing Club de Ferrol para o resto da súa tempada.
Notas
Véxase tamén Ligazóns externas Guillermo Fernández Perfil de adestrador en BDFutbol Guillermo Fernández Perfil de adestrador en LaPreferente.com
Categoría:Nados en 1978 Categoría:Nados en Madrid Categoría:Adestradores de fútbol de España Categoría:Adestradores do Racing de Ferrol Categoría:Adestradores do FC Cartagena Categoría:Adestradores do Racing de Santander Categoría:Adestradores do CE Sabadell Categoría:Adestradores do Vilalonga CF