En xogo é un programa deportivo da Televisión de Galicia en emisión dende 1985. Emitido nas noites dos domingos, dá un repaso á xornada deportiva, con análises, reportaxes e entrevistas, poñendo especial atención ao fútbol galego nas súas diferentes categorías, aínda que tamén inclúe información sobre outros deportes.
Con máis de 40 anos de emisión ininterrompida é o programa de televisión máis lonxevo de Galicia e o segundo de España, só por detrás de Informe semanal.
Historia Emitiu o seu primeiro programa o 31 de agosto de 1985, pouco despois do nacemento da Televisión de Galicia, sendo Xosé Luis Muñoz o seu primeiro director e Ovidio González o primeiro presentador. Con poucos medios nos seus inicios, o programa repasaba a xornada deportiva, centrándose especialmente nos clubs galegos de fútbol. Pouco despois do seu inicio, o programa pasou a ser presentado e dirixido polo xornalista melidense Manuel Pampín, que foi o rostro do programa ata 1993, cando Terio Carrera pasou a ser o presentador.
Durante as seguintes tempadas o En xogo foise modernizando, coincidindo cos anos gloriosos do fútbol galego, con ata tres clubs na Primeira División (Deportivo da Coruña, Celta de Vigo e Compostela). O 19 de maio do 2000 o programa emitiu un especial de nove horas, coincidindo coa consecución do título de liga por parte do Deportivo. Alfonso Hermida era o presentador naquela época, sendo sucedido en 2005 por Carlos Macía e Jessica Figueroa.
Entre 2006 e 2025 o espazo foi presentado por Óscar Benito, contando con colaboradores como Dani Mallo, Roberto Lago, Luis Timiraos ou Gustavo Varela. A continuación foi presentado brevemente por Sevi Martínez, ata que Gustavo Varela se converteu no novo rostro principal do programa. Ao longo dos anos teñen pasado polo programa centos de convidados, entre eles numerosas figuras do fútbol galego como Arsenio Iglesias, Luis Suárez, Fran, Iago Aspas ou Lucas Pérez.
Notas
Categoría:Programas da TVG