La década del 50 e.C. abarca'l periodu ente'l 59 e.C. y el 50 e.C..
Tuvo marcada pola espansión romana na Galia, la creciente rivalidá ente les principales figures polítiques de la República romana y el debilitamientu del Primer Triunviratu. N'Asia occidental, l'enfrentamientu ente Roma y l'Imperiu partu alterió l'equilibriu de poder rexonal, mientres que n'Asia oriental continuaron procesos de reorganización política y formación de nuevos reinos, como Silla na Península de Corea.
Fechos 59 e.C.: Xuliu César exerz el consuláu en Roma y consolídase l'alianza política informal conocida como Primer Triunviratu, formada por César, Pompeyu y Marcu Liciniu Crasu. 58 e.C.: Empiecen les principales campañes de la Guerra de les Galies: César derrota a los helvecios na batalla de Bibracte y posteriormente a les fuercies d'Ariovistu. 58 e.C.: Empieza una guerra civil ente distintos grupos de los xiongnu, potencia nómada dominante de les estepes d'Asia oriental. 57 e.C.: Según la cronoloxía tradicional coreana, Hyeokgeose de Silla funda'l reinu de Silla nel sureste de la Península de Corea. 57 e.C.: César derrota a los belxes na batalla del Sabis, ampliando'l control romanu sobre bona parte de la Galia septentrional. 55 y 54 e.C.: Xuliu César fai dos espediciones militares a Britania, los primeros intentos romanos conocíos de conquista de la islla. 53 e.C.: L'Imperiu partu derrota decisivamente al exércitu romanu de Marcu Liciniu Crasu na batalla de Carras. Crasu muerre na campaña y desfáise l'equilibriu políticu del Primer Triunviratu. 52 e.C.: Vercinxetórix lidera una gran rebelión gala contra Roma, pero ye derrotáu por César nel asediu d'Alesia, unu de los episodios decisivos de la Guerra de les Galies. 51 e.C.: L'asediu d'Uxellodunum pon fin a la última gran resistencia organizada contra la conquista romana de la Galia. 50 e.C.: La rellación ente César y Pompeyu deteriórase definitivamente cuando'l Senáu romanu intenta obligar a César a abandonar el mandu militar, preparando la crisis que va desembocar na guerra civil romana del 49 e.C.
Nacencies Titu Liviu (m. 17) historiador romanu, autor d'Ab Urbe condita libri, nacíu probablemente nel 59 e.C. en Patavium, l'actual Padua. Ptolomeu XIV (m. 44 e.C.) rei de la dinastía ptolemaica y correxente d'Exiptu xunto a la so hermana Cleopatra VII, nacíu alredor del 59 e.C.. Livia Drusila (m. 29) aristócrata romana, esposa d'Augustu, madre del emperador Tiberiu y una de les figures más influyentes de la dinastía Xulio-Claudia, nacida'l 30 de xineru del 59 o 58 e.C. Cornelia (m. 18 e.C.) aristócrata romana, fía d'Escribonia y de Cneu Corneliu Léntulu Marcelinu, esposa de Paulu Emiliu Lépido y media hermana de Xulia la Mayor. La so nacencia asítiase aproximadamente ente'l 50 y el 40 e.C. Shammai (m. ca. 30) sabiu xudíu y una de les principales figures del xudaísmu rabínicu tempranu, fundador de la escuela conocida como Casa de Shammai, nacíu alredor del 50 e.C..
Muertes Lucreciu (n. ca. 99 e.C.) poeta y filósofu romanu, autor de De rerum natura, muertu alredor del 55 e.C.. Marcu Liciniu Crasu (n. ca. 115 e.C.) políticu, xeneral y unu de los homes más ricos de la República romana, miembru del Primer Triunviratu con Xuliu César y Pompeyu, muertu nel 53 e.C. durante la campaña contra l'Imperiu partu. Publiu Clodiu Pulcru (n. ca. 93 e.C.) políticu romanu de los populares, tribunu de la plebe y rival de Cicerón, asesináu'l 18 de xineru del 52 e.C. cerca de Bovillae. Posidoniu (n. ca. 135 e.C.) filósofu estoicu, astrónomu, xeógrafu, historiador y matemáticu griegu nacíu n'Apamea, muertu alredor del 51 e.C. en Rodas.
Una década enantes / Una década depués Sieglu: Tabla añal del sieglu I e.C. ( Sieglu II e.C. - Sieglu I e.C. - Sieglu I)
Referencies
Enllaces esternos
Categoría:Sieglu I e.C.