350px|thumb|Mapa de los Estaos Xuníos, amosando los estaos, estremaos en condaos.Un condáu, nos Estaos Xuníos, ye una subdivisión política o alministrativa d'un estáu que consiste nún área xeográfica con llendes definíes y dél nivel de control sobro'l so gobiernuOverview of County Government, na web de l'Asociación Nacional de Condaos (National Association of Counties).. El términu county úsase, con esti significáu, en 48 de los estaos del país; Louisiana y Alaska tienen subdivisiones funcionalmente equivalentes nomaes, respeutivamente, parish y burough.

La mayoría los condaos tienen subdivisiones internes, nomaes town o township, municipality (conceyu) o unincorporated area (área non incorporada). Otros, por embargu, nun tienen subdivisiones menores, o inclusive organícense como consolidated city-county (ciudá-condáu consolidada). Delles ciudaes abarquen territorios de varios condaos; el casu estremu ye Nueva York, que ta sodividida en 5 condaos, que reciben na estructura de gobiernu local el nome de boroughs.

La Oficina del Censu de los Estaos Xuníos usa'l términu county equivalent (equivalente a condáu) pa describir entidaes alministratives comparables con condaos, pero que reciben nomes diferentes. Asina, sonlo, pa fines alministrativos y estadísticos, les parroquies (parishes) de Louisiana, los burgos organizaos (organized boroughs) d'Alaska, el Distritu de Columbia, y les ciudaes independientes de los estaos de Virxinia, Maryland, Missouri y Nevada. El territoriu non incorporáu d'Alaska, que recibe'l nome de Alaska Unorganized Burough, divídese en 11 árees censales que son equivalentes, con propósitos estadísticos, a los condaos. En 2020 hai 3.143 condaos y entidaes equivalentes nos 50 estaos y el distritu de ColumbiaCounty Totals Datasets: Population, Population Change and Estimated Components of Population Change: April 1, 2010 to July 1, 2012. 2012 Population Estimates. United States Census Bureau, Divison of Population, March 2013.. Hai otros 100 condaos o equivalentes más nos territorios non estatales del paísStates, counties, and statistically equivalent entities, na web de la Oficina del Censu., lo que fai un total de 3.243 condaos o entidaes equivalentes en tolos Estaos Xuníos. L'estáu con menos condaos ye Delaware, que tien trés, y el que tien más bayura d'ellos ye Texas, con 254.

La capacidá de gobiernu de los condaos ye mui variable nos diferentes estaos. En xeneral, son entidaes alministratives relevantes en tolos estaos sacante Rhode Island y Connecticut, nos que aboliose'l gobiernu condal y caltiénse namái el nome y les llendes tradicionales de los condaos pa cuestiones de calter estadísticu o alministrativu. Massachusetts, pela so banda, retiró-yos la mayoría de les competencies de gobiernu a ocho de los sos 14 condaos. El más pobláu del país ye'l condáu de Los Angeles, en California, con 10.098.052 habitantesLos Angeles County, California. Datos del condáu na web de la Oficina del Censu., y el mayor en territoriu llenda con él, y ye'l condáu de San BernardinoSan Bernardino County, California, na web de la Oficina del Censu.. Sicasí, hai cuatro boroughs d'Alaska que tienen más estensión qu'elli.

Los territorios de los Estaos Xuníos nun se sodividen en condaos, pero la Oficina del Censu divídelos n'entidaes equivalentes a condaos. Asina, por exemplu, na Samoa Americana la Oficina del Censu cuenta los distritos y los atolones del país como entidaes equivalentes a condaos, mentantu que lo qu'en Samoa nomen county son consideraes pola Oficina del Censu como entidaes llocales menores, non como condaosCounties of American Samoa, na web statoids.com..

Historia Los condaos foron una de les primeres formes de gobiernu llocal establecíes nes Trece Colonies qu'acabaríen formando los Estaos Xuníos orixinales. Virxinia creó los primeros condaos pa descargar de trabayu alministrativu a los funcionarios de la so capital, Jamestown. El so órganu llexislativu, la House of Burgesses (Casa de los Burgueses) dividió primero la colonia, en 1617, en cuatro incorporations (incorporaciones), y dempués, en 1634, n'ocho condaos (nomaos col nome tradicional inglés, shire): James City, Henrico, Charles City, Charles River, Warrosquyoake, Accomac, Elizabeth City y Warwick RiverHarch C.E., The First Seventeen Years. Virginia, 1607-1624, páxs. 20, 75-6. Jamestown 350th Anniversary Historical, 1957.. Maryland estableció'l so primer condáu, el de St. Mary, en 1637, y Massachusetts en 1643. Pennsylvania y Nueva York delegaron una parte importante del poder del gobiernu de la colonia nos gobiernos condales, estableciendo una forma de descentralización alministrativa que valió de guía pa la mayoría de los estaos del país sacante los de Nueva Inglaterra, nos que'l poder de los condaos siguió siendo relativamente débilReynolds Jr O.M., Local Government Law (3rd ed.), p. 19. West, St Paul, 2009..

Nel momentu de la independencia los autores de la Constitución nun decidieron la cuestión de la organización del gobiernu llocal, que dexaron en manes de los estaos. Les constituciones d'estos primeros estaos conceptualizaron el gobiernu del condáu como ún de los brazos del gobiernu estatal. Nel sieglu XX el papel de los gobiernos condales fortaleciose, una y bones adquirieron poderes propios y entamaron a formar comisiones encargaes d'aprobar les ordenances llocales aplicables nes sos árees non incorporaesCounties matter, na web de l'Asociación Nacional de Condaos.. Parte de les sos competencies tán delegaes n'entidaes alministratives menores, nomaes township sacante en Nueva York, Nueva Inglaterra y Wisconsin, aú reciben el nome de town. Ye la constitución de cada estáu la que determina si un condáu puede o non anular les decisiones de les sos township en determinaes cuestiones.

El condáu más reciente del país ye la ciudá-condáu consolidada de Broomfield, en Colorado, establecida a partir de partes del territoriu de cuatro condaos en 2001Broomfield's history, na web de la ciudá-condáu.. Les entidaes equivalentes a condáu más recientes son dellos burgos consolidaos d'Alaska: los de Skagway, establecíu en 2007, Wrangell en 2008 y Petersburg en 2013Petersburg Becomes 19th Borough In Alaska, na web de Alaska Public Media (3 de xineru de 2013)..

Entidaes equivalentes a condaos

Ciudá-condáu consolidada Una ciudá-condáu consolidada ye, al tiempu, una ciudá, que ye una corporación municipal, y un condáu, que ye una subdivisión alministrativa d'un estáu, y como talo tien el poder y les responsabilidaes de dambos tipos d'entidaes xurídiques. Hai 40 nel país, ente les que s'inclúin Augusta (Georgia), Denver (Colorado), Honolulu (Ḥawai), Indianapolis (Indiana), Jacksonville (Florida), Louisville (Kentucky), Lexington (Kentucky), Kansas City (Kansas), Nashville (Tennessee), Filadelfia (Pennsylvania) y San Francisco (California). Igualmente, dellos de los burgos d'Alaska xuniéronse coles sos principales ciudaes formando ciudá-burgos consolidaos que son quiciás les ciudaes xeográficamente más estenses del mundu y de les de menor densidá de población. Y la ciudá de Nueva Orleans amestose cola so parroquia (parish) pa formar una ciudá-parroquia consolidada, la New Orleans City Parish.

Equivalentes a condáu El términu county equivalent (equivalente a condáu) ye utilizáu pola Oficina del Censu de los Estaos Xuníos pa describir divisiones alministratives comparables colos condaos pero nomaes de forma diferenteCounty and equivalent entity, na web de la Oficina del Censu..

Les árees censales d'Alaska. La mayoría'l territoriu d'Alaska nun pertenez a dengún de los 19 burgos organizaos del estáu. Esta estensión de tierra, mayor que Francia y Alemaña xuntes, recibe'l nome oficial por parte del gobiernu del estáu de Unorganized Borough. Nun tien un gobiernu condal independiente, magar que nel so interior hai delles ciudaes incorporaes con gobiernu propiu, y ye gobernáu pol gobiernu estatal directamente. La Oficina del Censu, en cooperación col gobiernu estatal, sodividió, con propósitos estadísticos y de formación de distritos elecorales, esti territoriu n'once árees censales. Les parroquies de Louisiana. L'usu del términu parish (parroquia) pa denomar una entidá territorial con gobiernu llocal propiu remóntase a la dómina del gobiernu colonial español y francés, y fai referencia a la división territorial propia de les diócesis católiques. Les ciudaes independientes. Son ciudaes que nun pertenecen llegalmente a dengún condáu. Estrémense de les ciudaes-condáu consolidaes en que nestes, polo menos nominalmente, esiste'l condáu, mentantu que nes ciudae independientes nonCities 101-Consolidations, na web de la Lliga Nacional de Ciudaes (National League of Cities).. En xunetu de 2013 había 41 ciudaes independientes nel país: les 38 ciudaes de Virxinia, nel que por llei estatal cualquier territoriu incorporáu como ciudá queda fuera de la xurisdicción del condáu del que formaba parte'l so territoriuPopulation and Area of All Virginia Local Governments, 1790-2010. Virginia Department of Housing and Community Development, 2012., y amás les de Baltimore, Carson City (Nevada) y Saint Louis (Missouri). El Distritu de Columbia, que tien un estatus xurídicu especial y nun ta embaxu la xurisdicción de dengún estáu. La ciudá de Washington abarca tol territoriu del distritu que, acordies cola sección 8ª del artículu 1º de la Constitución de los Estaos Xuníos, ta embaxu la xurisdicción del Congresu. Cuando foi creáu en 1801 el distritu comprendía dos condaos y trés ciudaes. En 1846 el condáu d'Alexandria (qu'anguaño forma'l condáu d'Arlington y una parte de la ciudá independiente d'Alexandria), incluyendo la ciudá homónima, foi devueltu a Virxinia. En 1871 les trés entidaes que quedaben, les ciudaes de Washington y Georgetown y el condáu de Washington, que comprendía tol territoriu del distritu, amestáronse a traviés d'una llei del Congresu nel gobiernu consolidáu del distritu de Columbia. Otru decretu, de 1895, disolvió la ciudá de Georgetown.

Les ciudaes-condáu consolidaes nun son entidaes equivalentes a condaos pa fines alministrativos; una y bones esisten, polo menos nominalmente, tantu la ciudá como'l condáu, son clasificaes como condaos. Eso ye válido tamién pa los boroughs de Nueva York, caún de los cuales ye un condáu del estáu de Nueva York: Manhattan (condáu de Nueva York), Bronx (condáu de Bronx), Queens (condáu de Queens), Brooklyn (condáu de Kings) y Staten Island (condáu de Richmond).

Territorios Nun hai condaos nos territorios de los Estaos Xuníos. Samoa Americana tien los sos propios condaos, que nun son reconocidos como talos pola Oficina del Censu, que los toma como entidaes llocales menores. La mayoría de los territorios sodivídense en conceyos o xunidaes similares, que funcionen como equivalentes a condáu a efectos estadísticos. Ente ellos inclúinse2010 FIPS Codes for Counties and County Equivalent Entities, na web de la Oficina del Censu.:

Los 78 conceyos de Puertu Ricu Les trés islles principales de les Islles Vírxenes Americanes Guam como entidá única Los cuatro conceyos de les Islles Marianes del Norte Los trés distritos de Samoa Americana Los dos atolones de Samoa Americana Les nueve islles de les Islles Perifériques Menores de los Estaos XuníosTerritories of United States Minor Outlying Islands, na web statoids.com..

Gobiernu

Organización