Shaolin Kung Fu refierse a una coleición d'artes marciales de China que pretenden nicios nel Monesteriu Shaolin. De los milenta estilos de kung fu y wushu qu'hai o hubo, dellos centenares igual teníen dalguna rellación con Shaolin, pero sacantes unos pocos sistemes perconocíos, como'l Xiao Hong Quan, el Da Hong Quan, Yin Shou Gun, Espada de Damo, etc., diba ser cuasi imposible establecer una conexón verificable col Templu pa cualesquier arte en particular.
Artes internes y artes esternes
En 1669 Huang Zongxi describió les artes marciales de China en términos de Shaolin o artes “esternes” y Wudang o artes “internes”. Dende entós Shaolin vieno siendo popularmente un sinónimu de lo que se consideren artes marciales chines esternes, al marxe de si l'estilu particular en cuestión tien o non cualquier conexón col Monesteriu Shaolin. Dalgunos dicen que nun hai denguna diferenciación ente los sistemes que se dicen internos y los esternos de les artes marciales chines, mientres qu'otros maestros de nomadía espresaron opiniones estremaes. Por casu'l maestru de Taijiquan, Wu Jianquan:
Los que prautiquen Shaolinquan obren con fuercia y resistencia; les persones non amañoses nesta clas d'entrenamientu pierden llueu l'aliendu y galden. El Taijiquan nun se paez a esto. Fai pola relaxación activa de cuerpu, mente ya intención.
En 1784 el Clásicu del Boxéu: Métodos Esenciales de Boxéu fixo la referencia más temprana que conocemos al Monesteriu Shaolin como'l sitiu d'orixe del boxéu chinu. Otra vegada esto ye un equivocu, porque les artes marciales chines anticípense a la construcción del Templu Shaolin polo menos dellos cientos d'años.
Orixe
La lleenda de Bodhidharma
D'acordies colos Archivos Jingde de la Tresmisión de la Llámpara, de magar Bodhidharma, un monxu budista del sur de la India, dexara la corte l'emperador Wu de la dinastía Liang nel 527, dio finalmente nel Monesteriu Shaolin, onde “encaró a una paré nueve años, nun falando en tou esi tiempu”.
Según el Yi Jin Jing,
...dempués de que Bodhidharma encarara la paré nueve años nel templu Shaolin y fixera un furacu col so arremellu, dexó ellí un arca de fierro. Cuando los monxos abrieron esti arca atoparon dientro dos llibros: el Clásicu de Llimpieza de la Megolla y el Clásicu del Cambéu de Músculos y Tendones o "Yi Jin Jing". El primer llibru llevólu'l discípulu de Bodhidharma Huike, y perdióse; en cuantes al segundu, los monxos arrampuñáronlu egoístamente y punxéronse a prauticar les habilidaes qu'amosaba, esgolando per siendes heterodoxes, y perdiendo l'aldu correutu de cultivar la Verdá. Los monxos de Shaolin sacaron della sonadía pa ellos mesmos per aciu de la so habilidá de lluchar; too esto por cuenta de la so posesión d'esti manuscritu.
Historia
L'atribución de les artes marciales de Shaolin a Bodhidharma refugáronla munchos historiadores de les artes marciales del sieglu XX, primero por Tang Hao cola sida de que'l Yi Jin Jing ye falsu. Una llábana y la evidencia documental amuesen que los monxos históricamente honraron la forma “Rei Kimnara” del Bodhisattva Vajrapani como proxenitora de los sos estilos de llucha de palu y mano vacía.
Huiguang y Sengchou tuvieron metíos nes artes marciales enantes de que se convirtieren en dos de los primeros monxos de Shaolin, y ta rexistrao que prauticaben artes marciales primero de la llegada de Bodhidharma. L'habilidá de Sengchou col palu metálicu ta inclusive documentada nel canon budista chinu.
Los archivos sobre'l descubrimientu d'alixos d'armes nos monesterios de Changan cuando les redaes gubernamentales del 446 d.C. suxeren que los monxos chinos prauticaron artes marciales primero del establecimientu del Monesteriu Shaolin nel 497. Los monxos vinieron de les categoríes sociales ente les que les artes marciales prauticábense enforma enantes de la introducción del budismu. Hai nicios de que Huiguang, Sengchou ya inclusive Huike, el socesor inmediatu de Bodhidharma como patriarca del budismu Chan, pudieren ser xente de milicia enantes de retirase a la vida monástica. Per otra parte, los monesterios chinos, igual que los d'Europa, en munchos sentíos fueron de fechu llatifundios enforma grandes, ello ye, fontes de rentes regulares escomanaes que riquíen proteición.
Amás, los Anales de Primavera y Seronda de Wu y Yue, les Bibliografíes del Llibru de la Dinastía Han, y los Rexistros del Gran Historiador, documenten la esistencia d'artes marciales en China enantes de Bodhidharma. Les artes marciales Shuai Jiao y Sun Bin Quan, pa nomar dos, precedieron en sieglos l'establecimientu del Monesteriu Shaolin.
Dinastía Tang (618–907)
La evidencia más vieya de la participación de Shaolin en combate ye una llábana del 728 qu'atestigua dos ocasiones: una defensa del monesteriu contra bandíos alredor del 610 y la so función na derrota de Wang Shichong na Batalla de Hulao nel 621.
Como na mayoría de cambeos dinásticos, el fin de la dinastía Sui traxo un tiempu de trestornos y engarradielles pal tronu. Wang Shichong declaróse Emperador. Controlaba'l territoriu de Zheng y l'antigua capital de Luoyang.
Contra Luoyang nel Monte Huanyuan taba la propiedá del Valle del Ciprés, onde tuviera un fuerte cuando la dinastía Jin y una comandancia cuando los Qi del Sur. Wen, l'emperador Sui, amestara la propiedá a un monesteriu cercanu llamáu Shaolin pa que los sos monxos cultivaren, pero Wang Shichong, decatándose del so valor estratéxicu, arrampló cola propiedá y asitió ellí tropes y una torre de señales, y mangó una prefeutura llamada Yuanzhou. Amás atropara un exércitu en Luoyang pa marchar contra'l mesmu Templu Shaolin.
Los monxos de Shaolin aliáronse col enemigu de Wang, Li Shimin, y recobraron la propiedá del Valle del Ciprés, ganaron a les tropes de Wang y prindaron al so sobrín Renze.
Ensin el fuerte del Valle del Ciprés, nun había nada que torgara a Li Shimin marchar contra Luoyang dempués de que derrotara al aliáu de Wang, Dou Jiande, na Batalla de Hulao, forzando a Wang a rindise.
El padre de Li Shimin foi'l primer Emperador Tang, y el mesmu Shimin convirtióse nel segundu.
Dende entós Shaolin esfrutó'l patronax real de los Tang.
Anque la llábana del Monesteriu Shaolin del 728 atestigua estos incidentes nel 610 y 621, cuando los monxos entraron en combate, nun diz nin puntu de la práutica marcial nel monesteriu, o de cualesquier téunica de llucha na que tuvieren especializaos los sos monxos. Nin denguna otra fonte de los periodos Tang, Song y Yuan alude a entrenamientu militar nel templu.
D'alcuerdu con Meir Shahar, esto esplícase por una xuntura del gustu de finales de los Ming poles enciclopedies militares y, lo que ye más importante, la recluta d'irregulares civiles, incluyendo monxos, per aciu del amenorgamientu militar de los Ming nel sieglu XVI.
Dinastía Ming (1368–1644)
De los sieglos VIII a XV dengún documentu que nos llegara demuestra la participación Shaolin en combate; dempués los sieglos XVI y XVII ven que polo menos cuarenta fontes estenses atestigüen que los monxos de Shaolin non solo prauticaron artes marciales sinón que la práutica marcial convirtiérase nun elementu integral de la vida monástica de Shaolin, hasta'l puntu que los monxos sintieron la necesidá de xustificalo creando una nueva tradición budista. Referencies a les artes marciales de Shaolin apaecen en dellos xéneros lliterarios de finales de los Ming: epitafios de los monxos guerreros de Shaolin, manuales d'artes marciales, enciclopedies militares, escritos históricos, rellaciones de viaxes, ficción, ya inclusive poesía.
Estes fontes, en contraste coles del periodu de la dinastía Tang, refiérense a los métodos Shaolin de combate ensin armes, cola llanza, y col arma que yera'l puntu fuerte de los monxos de Shaolin y pola qu'algamaron sonadía: el palu. Haza mediaos del sieglu XVI espertos militares de perdayures na China Ming viaxaben a Shaolin pa estudiar les sos téuniques de llucha.
Alredor de 1560 Yu Dayou viaxó al Monesteriu Shaolin pa ver por sí mesmu les téuniques de llucha de los monxos, pero atopóles decepcionantes. Yu tornó pal sur con dos monxos, Zongqing y Pucong, a los qu'aprendió l'usu del palu nos siguientes trés años. Dempués Zongqing y Pucong tornaron al Monesteriu Shaolin y enseñaron a los sos hermanos monxos lo qu'ellos aprendieren. L'historiador d'artes marciales Tang Hao remontó l'estilu d'Enfrentase a Cinco Tigres del palu Shaolin a les enseñances de Yu.
El manual de Shaolin Kung Fu más tempranu que nos llegara, la Esposición del Métodu Orixinal del Palu Shaolin, escribiólu pel 1610 y publicólo en 1621 Cheng Zongyou, sobre lo qu'aprendió nuna estancia de más de diez años nel monesteriu.
Les condiciones d'ingobernabilidá de Henan—onde tal'l Monesteriu Shaolin—y provincies de la redolada a finales de la dinastía Ming y en tola dinastía Qing contribuyeron al desarrollu de les artes marciales. Meir Shahar llista les artes marciales Tai Chi Chuan, Boxéu de la Familia Chang, Baguaquan, Xingyiquan y Bajiquan como aniciaes nesta rexón y nesti tiempu.
Llucha contra los pirates
Pelos años 1540 y 1550, los pirates xaponeses conocíos como wokou atacaron les mariñes del este y sureste de China d'un mou ensin precedentes.
El xeógrafu Zheng Ruoceng apurre les referencies más detallaes del sieglu XVI, que confirmen que, en 1553, Wan Biao, Vicecomisariu Xefe del Altu Comisariáu Militar de Nanjing, empecipió la recluta de monxos —incluyíos dalgunos de Shaolin— contra los pirates. Los monxos guerreros participaron polo menos en cuatro batalles: nel Golfu de Hangzhou na primavera 1553, nel delta del ríu Huangpu en Wengjiagang en xunetu de 1553, en Majiabang na primavera de 1554, y en Taozhai na seronda de 1555.
Los monxos sufrieron la so derrota más grande en Taozhai, onde cuatro d'ellos cayeron en batalla. Los sos restos soterráronlos so la Stupa de los Cuatro Monxos Heroicos (Si yi seng ta) nel monte She a la vera de Shanghai.
La victoria más grande de los monxos foi en Wengjiagang. El 21 de xunetu de 553, 120 monxos guerreros mandaos pol monxu Shaolin Tianyuan ganaron a un grupu de pirates y escorrieron a los sobrevivientes sobre diez díes y venti milles. Los pirates sufrieron más de cien baxes y los monxos namái cuatro.
Non tolos monxos que llucharon en Wengjiagang yeren de Shaolin, y espoxigaron rivalidaes ente ellos. Zheng fala de la derrota que fizo Tianyuan a ocho monxos de Hangzhou rivales que desafiaron les sos órdenes. Zheng clasificó Shaolin como'l primeru de los tres centros cimeros budistes d'artes marciales. Como segundu, clasificó'l Monte Funiu en Henan, y en tercer llugar el Monte Wutai en Shanxi. Los monxos de Funiu prauticaben téuniques de palu qu'aprendieren nel Monesteriu Shaolin. Los de Wutai prauticaben la Llanza de la Familia Yang (Yangjia qiang).
Influencia fuera de China
Dellos llinaxes de Kárate tienen tradiciones orales que reclamen aniciar en Shaolin. Les tradiciones d'artes marciales en Xapón, Corea y sureste d'Asia citen la influencia china según fuera tresmitida por monxos budistes.
Propuestes recientes del sieglu XX, como'l Shorinji Kempo (少林寺拳法) prauticáu nel Sohonzan Shorinji de Xapón (金剛禅総本山少林寺), inda caltienen rellaciones col Templu Shaolin Song Shan de China por cuenta de llazos históricos. El xaponés Grupu Shorinji Kempo, que fai contribuciones financieres al caltenimientu del históricu edificiu del Templu Shaolin Song Shan, recibió en 2003 la reconocencia de China.
Na cultura popular