Paulino Álvarez-Robles y Suárez (Mieres, Asturies, el 14 de setiembre de 1850- Palencia, 1939) Fraile dominicu, sacerdote, predicador, escritor ya historiador de la Orde de Predicadores, y llegó a ser una de les figures asturianes más destacaes de la vida relixosa española de finales del sieglu XIX y empiezos del XX.
Biografìa Facía los primeros estudios nel Seminariu Conciliar d'Uviéu, inicialmente cola intención de siguir la carrera eclesiástica. Más tarde decidió entrar na Orde de Santu Domingu. En 1867, siendo tovía bien mozu, consiguió l'autorización del Obispáu d'Uviéu pa tomar l'hábitu dominicu nel conventu de San Xuan Bautista de Corias, en Cangas del Narcea. La documentación conservada nel Archivu Históricu de los Dominicos confirma la so procedencia de Mieres y recueye tamién la cuestión de los sos apellíos.
Tomó l'hábitu dominicu y profesó'l 9 d'ochobre de 1868. En Corias completó la so formación relixosa y los estudios eclesiásticos. Dempués de ser ordenáu sacerdote, los sos superiores encargáron-y en 1876 una importante misión: participar na fundación del conventu de San Xosé de Padrón (La Coruña), tarea a la que dedicó dellos años.
En 1879 foi destináu como profesor al seminariu de Belchite (Zaragoza), anque permaneció ellí poco tiempu. A partir de 1880, la so actividá principal pasó a ser la predicación. Percorrió numberoses ciudaes y llocalidaes españoles —ente elles Santander, Salamanca, Palencia, Barcelona y Cádiz— participando en misiones populares y solemnidaes relixoses. La so capacidá oratoria proporcionó-y una gran reputación como predicador sagradu, hasta'l puntu de que la so fama trespasó les fronteres españoles.
Al empar, desarrolló una intensa actividá intelectual. Escribió sobre relixón, espiritualidá, historia ya historia de la Orde de Santu Domingu, y collaboró en diverses publicaciones relixoses. En 1886 fundó la revista dominicana El Santísimo Rosario, de la que foi direutor durante una etapa importante. Tamién collaboró en publicaciones como El Rosario, de Barcelona, Propaganda Católica y Voz Dominicana, de Madrid.
La so producción escrita tuvo una relación mui estrecha cola historia dominicana. Ente los sos trabayos hai estudios sobre personaxes y acontecimientos venceyaos cola Orde, amás de prólogos y collaboraciones n'importantes obres históriques y bibliográfiques. Constan, por exemplu, los sos escritos sobre los dominicos del Perú y sobre figures destacaes de la Orde.
El so prestixu como orador llegó a ser especialmente notable nes dos últimes décades del sieglu XIX y nes primeres décades del XX. Les fontes biográfiques de la época preséntenlu como un relixosu de gran capacidá oratoria y como un escritor fecundu en materies relixoses ya históriques.
Tamién tuvo venceyáu a Palencia, onde llegó a exercer como prior del conventu dominicu. Ellí recibió de la Diputación Provincial un premiu por una monografía titulada Un palentino ilustre. La so trayectoria amuesa, por tanto, una combinación poco habitual de predicación, actividá pastoral, enseñanza, periodismu relixosu ya investigación histórica. El desenvolvimientu triunfal del sobresaliente predicador, arrodiáu constantemente de motivos de satisfacción, presenta tamién la so fase dolorosa, que constitúi'l capítulu d'amargures na esistencia del P. Paulino. Tuvo'l so orixe n'otru de los ésitos más eloxiaos del orador sagradu: les conferencies d'exercicios espirituales pronunciaes n'abril de 1891 nel Colexu de Santa Isabel, dirixíu poles llamaes Dames Ingleses del conventu de l'Asunción, y que tuvieron especialmente dedicaes a l'aristocracia femenina madrilana.
A estos exercicios unviaba la reina María Cristina les sos dames d'honor, unes pela mañana y otres pela tarde; almirada polo que-y cuntaben elles de les pallabres encendíes de fervor relixosu que-y sentíen al P. Paulino, la reina entró en deseos de conocer al fraile, polo que, yá remataos aquellos exercicios, esti indicó que se dignara ella señalá-y día y hora en que podría dir a cumplimentala.
A esto la reina contestó:
—Non; yo soi la que quier dir a velo a él.
Y el primer domingu siguiente, la reina María Cristina d'Habsburgu-Lorena presentóse nel Colexu onde residía Fr. Paulino, acompañada de familiares, dames, el gobernador civil y don Alejandro Pidal y Mon.
Mientres el té col que fueron agasayaos los visitantes y la non corta permanencia d'estos nel Colexu, la reina estableció col fraile unes rellaciones mui cordiales, que se caltuvieron durante dellos años nun tratu casi familiar per parte d'ella, que llegó a considerar al P. Álvarez como ún de los sos vasallos más queríos y distinguios.
Nomólu, por resolución espontánea, Predicador de la so Maxestá, cargu al que'l P. Paulino dio efectividá predicando na Capilla de Palaciu'l sermón de la Purísima, recoyíu depués nel volume númberu XXII.
Atentu al requerimientu real de que, siempre que pasara per Madrid, nun dexara de dir visitala, procuró siempre satisfacer esti deséu de la reina, tanto en Madrid como nes otres residencies reales.
La reina convidábalu a la so mesa, a dicir la misa destinada al so séquitu, ponía coches a la so disposición, tenía pa él les más delicades distinciones y nun escondía'l so deséu d'eleválu a ocupar la primera mitra que quedara vacante. Continuaron estes rellaciones de reina y fraile hasta l'añu 1898.
Fray Paulino finó'l 21 de mayu de 1939 nel conventu dominicu de Palencia, a los 88 años. Los sos restos quedaron inicialmente nel panteón de la comunidá dominicana de Palencia y, décades dempués, fueron treslladaos a Cádiz.
El so recuerdu en Mieres La importancia que tuvo pa la so localidá natal quedó reflexada tamién dempués de la so muerte. En 1954, l'Ayuntamientu de Mieres acordó poner a una cai de la villa'l nome de Fray Paulino Álvarez Robles. Más tarde, en 1958, consta una moción municipal rellacionada cola colocación d'una placa nesta cai.
Referencies El Españolito: Paulino Àlvarez-Robles La Nueva España: las equivocaciones de Fray Paulino El blog de Acevedo: un dominico de Mieres
Categoría:Relixosos y relixoses d'Asturies