Frances Perkins foi una socióloga, reformadora llaboral y política d'Estaos Xuníos. Exerció como secretaria de Trabayu d'Estaos Xuníos ente 1933 y 1945 nel gobiernu de Franklin D. Roosevelt, convirtiéndose na primer muyer que formó parte d'un gabinete presidencial d'Estaos Xuníos.«Frances Perkins», National Park Service.
Biografía Nació en Boston col nome de Fannie Coralie Perkins. Graduóse nel Mount Holyoke College en 1902 y posteriormente estudió economía y socioloxía na Columbia University. Empezó a trabayar en organizaciones dedicaes a les condiciones llaborales, la protección de los consumidores y la reducción de la pobreza.
L'incendiu de la fábrica Triangle Shirtwaist de Nueva York en 1911, nel que morrieron 146 trabayadores, tuvo una influencia decisiva na so carrera. Perkins participó na comisión encargada d'investigar les condiciones de les fábriques del estáu de Nueva York y promovió normes sobre seguridá, xornaes llaborales y protección de muyeres y menores.
En 1929 el gobernador Franklin D. Roosevelt nomóla comisionada industrial del estáu de Nueva York. Cuando Roosevelt llegó a la presidencia en 1933 escoyóla secretaria de Trabayu. Perkins desempeñó'l cargu durante doce años y participó directamente nel diseñu de parte importante del New Deal.
Foi una de les principales impulsores de la Social Security Act de 1935 y participó na creación de normes sobre salariu mínimu, xornada máxima, seguro de desemplegu y prohibición del trabayu infantil. Tres dexar el gobiernu federal exerció actividá académica, principalmente na Cornell University.
En 2024 la casa familiar de Perkins en Maine foi declarada Frances Perkins National Monument, integrándose nel sistema de parques nacionales d'Estaos Xuníos.«Frances Perkins National Monument», National Park Service.
Publicaciones People at Work (1934) The Roosevelt I Knew (1946)
Referencies
Enllaces esternos Frances Perkins nel National Park Service
Categoría:Políticos d'Estaos Xuníos Categoría:Sociólogos d'Estaos Xuníos Categoría:Secretarios de Trabayu d'Estaos Xuníos Categoría:Muyeres polítiques d'Estaos Xuníos Categoría:Nacíos en Boston