Patricia López Arnaiz ye una actriz española, ganadora de dos premios Goya a la meyor interpretación femenina protagonista.
López Arnaiz ye conocida polos sos papeles de Teresa Blanco na serie La otra mirada (2018-2019), Begoña Uribe n'Intimidá (2022), pola que ganó un Premiu Feroz a meyor interpretación femenina de repartida en televisión, y pol so papel protagónico na película Ane (2020). Por esti papel foi galardonada col Premiu Goya a meyor interpretación femenina protagonista, el Premiu Forqué a meyor actriz de cine y el Premiu Feroz a meyor actriz protagonista. En 2023 coprotagonizó 20.000 especies d'abeyes, pola que llogró otra nominación al Goya y participó na selección oficial de Festival de Berlín.
Biografía Dempués de cursar Publicidá y Relaciones Públiques na Universidá del País Vascu, estudió interpretación n'Escuela de Teatru Vitoria "Ortzai". Empezó a trabayar nel teatru y en 2008, participó en Maitasunaren Saltsa. En 2017 interpretó a Rosaura, una de les hermanes de la protagonista, na película El guardián invisible, dirixida por Fernando González Molina y basada na novela de Dolores Redondo. Darréu, participaría nes secueles de la película, Legado en los huesos (2019) y Ofrenda a la tormenta (2020).
En 2018 participó na serie La peste d'Alberto Rodríguez, onde interpretó a Teresa de Pinelo. N'abril del mesmu añu, estrenóse la serie de Televisión Española La otra mirada (2018), na cual interpretó a Teresa Blanco, una muyer viaxera que llega a Sevilla como profesora y qu'escuende un secretu. La serie, de calter feminista, tuvo crítiques positives y foi anovada por una segunda temporada que s'estrenó l'añu siguiente.
En 2020 protagonizó Ane, una película de David Pérez Sañudo na que tuvo una destacada interpretación pola que llogra dellos premios: el premiu Forqué, el premiu Güeyu Críticu de RNE el premiu a la meyor actriz protagonista nos premios Feroz y el Premiu Goya a la meyor interpretación femenina protagonista en 2021. Un añu más tarde anuncióse el so papel protagónico en La hija de Manuel Martín Cuenca, al pie de Javier Gutiérrez.
En xineru de 2022 estrenó la serie Feria: la luz más oscura col papel de la policía Sandra, siendo la primer serie orixinal de Netflix España d'horror. Tamién s'anunció el so papel principal para la película El visu, dirixida por Ibón Cormenzana, estrenada en marzu del mesmu añu.
En 2023 participó na película 20.000 especies d'abeyes, de Estibaliz Urresola Solaguren, pola cual recibió aponderamientos de la crítica y llogró el premiu a la meyor actriz de repartida nel Festival de Málaga.
En 2024 protagonizó Nina, d'Andrea Jaurrieta, presentada nel Festival de Cine de Málaga. Amás, tamién encabezó la repartida de la cinta Los destellos, pola que foi nomada como meyor actriz protagonista nos Premios Goya, los Premios Feroz, les Medayes del Círculu d'Escritores Cinematográficos, los Premios Forqué y los premios de la Unión d'Actores y Actrices.
Volvió recibir nominaciones por Los domingos (2025) na categoría de meyor interpretación femenina protagonista.
En 2026 ganó el Premiu Feroz a Meyor actriz protagonista d'una película por Los domingos.
Referencies
Categoría:Actores y actrices del País Vascu