L'Aeropuertu de Mánchester ye un aeropuertu internacional asitiáu en Ringway, Mánchester, Inglaterra; ta a 11 km al suroeste del centru de la ciudá de Mánchester. En 2024, foi'l tercer aeropuertu más tráficu del Reinu Xuníu en númberu de pasaxeros (el más concurríu foi'l de Londres), y el 19ᵘ d'Europa en 2024, con 30,9 millones de pasaxeros atendíos.
L'aeropuertu tien una terminal de carga y tres terminales de pasaxeros, anque un programa de remodelación de 1.300 millones de llibres va xunir les terminales 1 y 3 en 2025. Ocupa una superficie de 560 ha y tien vuelos a 199 destinos, lo que lu asitia nel puestu númberu trece a nivel mundial en númberu de destinos atendíos.
Abiertu oficialmente'l 25 de xunu de 1938, conocíase inicialmente como Aeropuertu de Ringway. Durante la Segunda Guerra Mundial, como RAF Ringway, foi base de la Royal Air Force. L'aeropuertu ye propiedá y ta xestionáu por Manchester Airports Group (MAG), un grupu propiedá de los diez conceyos metropolitanos del Gran Mánchester, col Conceyu de la Ciudá de Mánchester como accionista principal, y la firma financiera australiana IFM Investors. Ringway, que da nome al aeropuertu, ye un pueblu con pocos edificios y una ilesia nel estremu occidental del aeropuertu.
En 2017 entamó un programa de remocique d'ocho años que va culminar col zarru de la terminal 1 y l'ampliación de la terminal 2 pa facilitar meyor los tresbordos. La nueva terminal, prevista pa completase en 2025, va xestionar el 80% del tráficu de pasaxeros. La terminal 3 va caltenese operativa con enfotu n'aereollinies de baxu costu y vuelos de curtia distancia.
Historia
La construcción entamó na parroquia de Ringway el 28 de payares de 1935 y l'aeropuertu yá taba parcialmente operativu en xunu de 1937, completándose la construcción el 25 de xunu de 1938. En 1938, KLM convirtióse na primer aereollinia n'operar vuelos comerciales programaos a Mánchester.
Durante la Segunda Guerra Mundial, RAF Ringway tuvo un papel importante na producción d'aviones militares y nel entrenamientu de paracaidistes. N'acabando la guerra, la base volvió al usu civil y foi espandiéndose gradualmente hasta algamar el tamañu actual. Na década de 1960, Mánchester yera'l segundu aeropuertu con más tráficu del Reinu Xuníu (tres Heathrow).
En 1946, Air France entamó operaciones dende Mánchester tres l'empiezu de los servicios de pasaxeros en tiempu de paz y ye l'aereollinia con presencia continua más antigua nel aeropuertu, celebrando 75 años de serviciu en 2021. En 1953, Mánchester entamó a operar les 24 hores del día, con capacidá pa xestionar vuelos de día y nueche, lo que-y permitió atender a 163.000 pasaxeros. Nesi mesmu añu entamaron los vuelos intercontinentales con Sabena Belgian escontra Nueva York, siguíos de cerca polos servicios a Nueva York de la British Overseas Airways Corporation (BOAC).
Los antiguos edificios de la RAF fueron sustituyíos por una nueva terminal de pasaxeros construyida específicamente, qu'abrió en 1962. La nueva terminal presentaba una sala de salíes moderna con grandes lluminaries venecianes de cristal y les primeres pontes d'abordaxe cubiertes pa pasaxeros n'Europa.
Los primeros vuelos tresatlánticos con orixe en Mánchester entamaron en 1963. El serviciu, tres veces a la selmana, yera operáu por BOAC usando un Boeing 707 vía Glasgow Prestwick. En 1969, la pista foi estendida hasta 2.745 m, lo que permitió a los aviones despegar con cargues completes y volar ensin escala hasta Canadá.
En 1971, l'aeropuertu algamó un finxu al atender más de dos millones de pasaxeros nun añu. Al añu siguiente abrióse una carretera d'enllaz que coneuta l'aeropuertu cola M56, meyorando l'accesu por carretera dende Mánchester, Cheshire y el norte de Gales. En 1975, Ringway foi oficialmente renomáu como Aeropuertu Internacional de Mánchester.
L'aeropuertu esperimentó una rápida crecedera y espansión nos años 1980 y 1990, configurando la infraestructura pa les décades siguientes. Munches de les meyores realizaes nesti periodu caltiénense entá güei o fueron modificaes de recién col entamu del Proyeutu de Tresformación de Mánchester. El númberu de pasaxeros siguió creciendo, algamando la cifra d'un millón de pasaxeros al mes per primer vegada en 1987. Esti crecimientu estimuló planes d'espansión, incluyendo la planificación d'una nueva terminal. Al añu siguiente, en 1988, Mánchester celebró'l so xubiléu d'oru.
La terminal A, que güei forma parte de la terminal 3, foi inaugurada por Diana, Princesa de Gales en 1989. En 1993, la Terminal 2 foi inaugurada oficialmente pol duque d'Edimburgu, xunto cola apertura oficial de la Estación del Aeropuertu de Mánchester. La terminal principal de pasaxeros pasó a denominase terminal 1. Dende 1997 hasta 2001 construyóse una segunda pista, lo que provocó protestes a gran escala en Cheshire, especialmente nel pueblu de Styal, onde se vieron afeutaos hábitats naturales y se derribaron edificios protexíos pa faer espaciu pa la obra.
A principios de los años 2000, British Airways amenorgó les sos operaciones nel Aeropuertu de Mánchester tres la venta de la so filial BA Connect a Flybe y pol fin del so alcuerdu de franquicia con GB Airways, empresa que depués foi vendida a easyJet. N'ochobre de 2008, suspendióse'l serviciu diariu a Nueva York-JFK, y en marzu de 2013 tamién se suprimió'l vuelu diariu a Londres-Gatwick, anque dambos servicios fueron restablecíos años depués.
Tres asumir dalgunes rutes de BA Connect, Flybe sumó nuevos destinos. En 2012, introdució'l conceutu de "mini hub", coordinando les llegaes y salíes de dellos vuelos nacionales a lo llargo del día, creando combinaciones como Norwich-Mánchester-Belfast, Glasgow-Mánchester-Southampton y Edimburgu-Mánchester-Exeter con tiempos de tresbordu curtios y convenientes.
L'Airbus A380 llegó en 2010, operáu por Emirates, que sigue operando l'aeronave tres veces al día na ruta escontra Dubái.
L'Aeropuertu de Mánchester celebró'l so 75ᵘ aniversariu en 2013. Nesi añu tamién se completó ya inauguró la nueva torre de control de tráficu aereu, qu'agora ta nun edificiu independiente, y nun enriba del aeropuertu como antes. Tamién se aprobó la planificación d'Airport City Manchester.
En 2014, inauguróse la ruta del tranvía Metrolink al Aeropuertu de Mánchester como parte de los planes d'espansión de la rede, facilitando'l tresporte ente l'aeropuertu y el centru de la ciudá.
En 2019, completóse la primer fase de la estensión de la terminal 2, y el Finger 1 abrió'l 1 d'abril de 2019. La segunda fase del plan d'ampliación abrió'l 14 de xunetu de 2021.
Na parte final de la década, Monarch Airlines, Thomas Cook Airlines y Flybe entraron en concursu d'acreedores y cesaron les operaciones, lo que tuvo un gran impactu nel emplegu llocal y nel funcionamientu del aeropuertu, amás de dexar a miles de pasaxeros atrapaos, munchos d'ellos nel estranxeru. Monarch operó en Mánchester ente 1981 y 2017, con vuelos curtios y medios a Europa, y tenía una base de mantenimientu nel aeropuertu. Entró tamién en concursu y cesó operaciones en 2017. Thomas Cook Airlines foi un operador importante en Mánchester, con vuelos programaos y chárter a más de 50 destinos n'Europa, América y el Caribe. La empresa madre tamién tenía una base de mantenimientu nel aeropuertu. L'aereollinia entró en liquidación obligatoria en setiembre de 2019 y munchos aviones quedaron aparcaos nel aeropuertu mientres se resolvíen discutinios de pagu. Flybe foi una aereollinia británica con una base importante en Mánchester que xestionaba más de la metá de los vuelos nacionales nel Reinu Xuníu fuera de Londres. Un sociedá qu'incluyía a Stobart Air y Virgin Atlantic formuló planes pa salvar Flybe col llanzamientu de Connect Airways, pero los planes fueron abandonaos a principios de 2020 y cesaron toles operaciones.
Como la mayoría de los aeropuertos británicos y internacionales, l'Aeropuertu de Mánchester viose gravemente afeutáu pola pandemia de COVID-19 y la posterior cayida nel númberu de pasaxeros. Delles aerollinies cesaron, pausaron o amenorgaron les sos rutes al aeropuertu. El descensu nel tráficu de pasaxeros provocó'l zarru temporal de les terminales 2 y 3.
A finales de 2020, American Airlines anunció que cesaría los sos vuelos diarios a Filadelfia por cuenta de les interrupciones nel tráficu aereu causaes pola pandemia de coronavirus. La salida d'American Airlines marcó tamién la marcha de la última aereollinia d'Estaos Xuníos con base en Mánchester. Anteriormente, American Airlines operaba servicios a Nueva York-JFK, Chicago, Dallas-Fort Worth, Miami, Boston y Charlotte.
Datos recoyíos y publicaos pola Autoridá d'Aviación Civil (CAA) amuesen que nos primeros once meses de 2020 (de xineru a payares), el númberu de pasaxeros en terminal y tresbordu cayó de 29.374.282 en 2019 a 6.787.127 en 2020.
Referencies
Enllaces esternos
Categoría:Aeropuertos internacionales del Reinu Xuníu