William Trufant Foster foi un educador y economista d'Estaos Xuníos, les sos teoríes fueron especialmente influyentes nos años 1920. Foi'l primer presidente de Reed College.
Primeros años y educación Foster nació en Boston (Massachusetts), el 18 de xineru de 1879. Asistió al Roxbury High School en Boston. Graduóse na Universidá de Harvard con una llicenciatura en artes (A.B.) en 1901 y un máster en humanidaes (A.M.) en 1904, títulos equivalentes a un grau y máster universitariu nel sistema educativu européu.
Carrera Foster foi instructor d'inglés en Bates College en Maine, dende 1901 hasta 1903, y exerció como entrenador del programa de debate de Bates, conocíu internacionalmente. Tamién foi profesor d'inglés y argumentación en Bowdoin College en Maine en 1905. Foi autor de Argumentation and Debating, publicada en 1908. Finalmente, Foster recibió doctoróse en 1911 nel Teachers College de la Universidá de Columbia.
La so concepción de "la universidá ideal", espresada nel capítulu final de la so tesis doctoral, llevólu a ser nomáu primer presidente de Reed College. Ocupó'l cargu ente 1911 y 1919. Refugó los deportes interuniversitarios y la vida griega (fraternidaes) en favor d'una educación académica intensa. Fomentó una estrecha collaboración intelectual ente profesores y estudiantes. Trató a los estudiantes de grau como si fueren d'estudios de posgráu y creó un sistema de seminarios pequeños, exámenes comprensivos, investigación de grau y tesis de fin de carrera.
Foi direutor de la Pollak Foundation of Economic Research ente 1920 y 1950, en Newton, onde enfatizó la necesidá de protexer los intereses de los consumidores.
Economía Collaboró col so compañeru de clase en Harvard, Waddill Catchings, nuna serie de llibros d'economía que fueron altamente influyentes nos Estaos Xuníos nos años 1920. Los sos llibros influyentes, escritos con Catchings, fueron Money (1923), Profits (1925), Business Without a Buyer (1927), The Road to Plenty (1928), y Progress and Plenty (1930).
Xunto con Catchings, foi unu de los economistes más destacaos antes de la economía keynesiana, dientro de la tradición subconsumista, defendiendo cuestiones similares a les de Keynes como la paradoxa del aforru y l'intervencionismu económicu. Güei en día, dambos son raramente mencionaos nos testos económicos contemporáneos, al tar eclipsaos pola obra de Keynes The General Theory.
Foster y Catchings refugaron la economía del laissez-faire tradicional y pidieron una intervención federal agresiva pa equilibrar la economía y evitar que les fuercies desestabilizadores acabaren cola prosperidá. El problema principal yera'l subconsumu, que podría superase con un gastu estratégicu del gobiernu n'obres públiques. La teoría influyó fuertemente nos programas contra la depresión de Herbert Hoover, Franklin D. Roosevelt y el presidente de la Reserva Federal Marriner Eccles.
Referencies
Enllaces esternos
Categoría:Persones de Boston Categoría:Escritores d'Estaos Xuníos Categoría:Economistes d'Estaos Xuníos Categoría:Profesores d'Estaos Xuníos