La Sociedá de la Llingua Sarda (Sotziedade pro sa Limba Sarda, en sardu) ye una asociación cultural nacida en 1987, en Casteddu, y con sede en Nùgoro.
Historia El principal oxetivu de la SLS, fundada en 1987 pol editor, escritor y traductor Diegu Corràine y pol lingüista Massimo Pittau, ye la de "promover, ampliar, difundir y valorar al traviés cualesquier mediu la conocencia y l'usu de la llingua sarda". Per bien d'años, la SLS foi la referencia na llucha en favor de la unidá y de la oficialidá del idioma. Esti llabor sacóse alantre con decenes de conferencies y de seminarios en decenes de pueblos y ciudaes de Sardeña y tamién fuera de la islla. La SLS inauguró la tradición de falar en sardu en públicu en tou tipu d'eventos, cosa rara hasta entós. La organización ye heriede de la tradición y de les idees del Comité de la Llingua Sarda (Comitadu pro sa Limba Sarda) que fora la que creó y promovió la iniciativa llexislativa popular p'actualizar l'artículu 6 de la Constitución de la República Italiana pa llograr la reconocencia de la minoría llingüística sarda.
Foi tamién l'asociación que dio fuerza al procesu d'estandarización de la llingua sarda, qu'arrincó col seminariu internacional Presente de les llingües minoritaries y problemes de la so normalización (Presente de sas limbas minoritàrias e problemas de sa normalizatzione issoro), entamáu'l 25-9-88, en Santu Lussùrgiu, y rematáu en 2001 cola propuesta de la Llingua Sarda Unificada o LSU (Limba Sarda Unificada) y en 2006 cola normativa ortográfica definitiva Llingua Sarda Común o LSC (Limba Sarda Comuna).
Del 15 de payares de 2021 ocúpase de la Biblioteca Heinz Jürgen Wolf d'Estudios Llingüísticos y de llingua sarda con sede en Nùgoro, dedicada al llingüista Heinz Jurgen Wolf y abierta al públicu.a La biblioteca nació gracies a la voluntá de la fía, Mimi, y de la muyer, Silvia Wolf, que donaron la biblioteca del estudiosu a la Sociedá, y a la collaboración de l'Asociación Nacional de Toyíos y Discapacitaos de Guerra de Nùgoro, que ufrió los locales.
Diegu Corràine ye'l presidente de la SLS; Antonello Garau, el vicepresidente; y Lisandru Beccu el secretariu.
Referencies
Enllaces esternos
Categoría:Idioma sardu Categoría:Organizaciones d'Italia Categoría:Academies llingüístiques