Gloria Velasco Blanco foi una política asturiana. Foi la primer muyer en ser alcaldesa de Parres.

Biografía Nació en Les Arriondes el día 24 d'agostu de 1905 y estudió na escuela llocal pa darréu convertise nuna bordadora de prestixu dientro de la llocalidá. En 1922 casó en Cuadonga con Eugenio Alonso Cerra y tuvo cuatro fíos, Eugenio, José Luis, Alfredo y María Teresa Alonso Velasco.1

Tres la proclamación de la II República en 1931, Velasco empecipió la so trayectoria política afiliándose al PSOE y a les Mocedaes Socialistes Unificaes en 1936. En 1937, avanzada yá la Guerra Civil Española, pasó a formar parte de la UXT y darréu desempeñó'l cargu de Conseyera nel Conceyu de Parres, siendo Delegada d'Asistencia Social y d'Enseñanza. Ellí foi onde, en xunu de 1937, exerció como tercer teniente d'alcalde del Conseyu Municipal.

Viose obligada a fuxir a Cataluña tres unos meses como alcaldesa de Parres y ellí emplegóse na secretaría d'UXT en Farners de la Selva, provincia de Girona. Mientres la Guerra Civil representó al Centru Asturianu de Cataluña na Comisión Consultiva d'Ayuda a los Refuxaos y tuvo al so cargu'l cuidáu y l'asistencia de los neños y neñes güérfanos, primero en Xixón y depués en Cataluña.3

Exilióse a Francia pero embarcó en 1939 nel Winnipeg de camín a Chile dempués de que'l gobiernu chilenu ufiertara agospiamientu a los refuxaos españoles. Ellí fíxose bordadora y finó tres una enfermedá que la dexó paralítica en 1953.

Velasco foi defensora del derechu al votu de les muyeres y tamién de la concesión del divorciu. Consideraba que tolos españoles, ensin distincción de xéneru, teníen de tener la oportunidá de desempeñar cualquier cargu públicu si cuntaben coles aptitúes pa ello.​ Velasco foi una muyer comprometida cola presencia y participación de les muyeres nel ámbitu políticu. Foi pionera n'asumir el cargu d'alcaldesa nel conceyu.

Reconocimientos Nel añu 2024, el Conceyu de Parres, por cuenta de la celebración del Día Internacional de la Muyer, convocó'l "I Concursu lliterariu pa muyeres Memorial Gloria Velasco", en reconocimientu a la so figura. La escritora Carmen Galván ganó esa primer edición.

Referencies

Enllaces esternos

Categoría:Políticos y polítiques d'Asturies Categoría:Persones de Parres