Luzdivina Megido Fernández , conocida como Luz Megido y en dellos rexistros reseñada col nome de Ludivina, foi una maestra asturiana. En 1937, foi una de les maestres qu'acompañó a los neños de Rusia.
Biografía Nació na llocalidá de Felechosa, nel conceyu d'Ayer. Yera fía de Rosa Fernández Blanco y de José Megido Álvarez.
Foi una de les maestres del plan profesional de 1931 y una de les cursillistas del 36, que yera'l grupu de funcionarios de la Segunda República Española inscritos nos cursinos de perfeicionamientu de 1936. Nos primeros díes de setiembre de 1937, foi una de les maestres convocaes pola Conseyería d'Instrucción Pública, al traviés d'un comunicáu en prensa llocal, a asistir a xunta na Fundación Miranda de Xixón. El 23 de setiembre, Megido xunto a otros maestros y educadores que tuvieron na citada xunta, partieron nun barcu dende'l puertu d'El Musel acompañando a los neños de Rusia.
Exerció como maestra en delles ciudaes de la Xunión Soviética, como Krasnovídovo, Óbninskoe y Leningráu. Nesta ciudá, foi profesora na Casa de Moces, onde tamién exercía'l so maríu Vicente Sánchez.
N'abril de 1941, tuvo una fía, Luz, y poco dempués empezó'l sitiu de Leningráu. En marzu de 1942, Megido xunto cola so familia consiguieron salir del cercu y el so home foi ingresáu nel hospital. Pela so parte, ella foi evacuada cola so fía a una llocalidá de Mostovoye, al norte d'El Cáucasu, con otros neños españoles y los sos educadores. Unos meses más tarde, tienen que volver fuxir a Sukhumi, nel Mar Negru, y dende ehí viaxen en ferrocarril al este para cruciar el mar Caspiu hasta Samarcanda. Finalmente, mientres la Segunda Guerra Mundial el so destín definitivu foi Ufá, capital baskir de los Montes Urales.
Tres la guerra, en Moscú, exerció como de profesora de castellanu nel Departamentu de Llingües de diversos centros universitarios. Tamién trabayó de llocutora radiofónica en Radio Bucarest, emitiendo col so maríu un programa internacional n'español. Exerció amás como profesora d'estudios de posgráu de l'Academia de Comerciu Esterior. Megido, xunto coles maestres María Rodríguez Iriondo y Alejandra Soler, desenvolvió les bases metodolóxiques para la enseñanza del idioma español na URSS.
En mayu de 1957, intentaron volver a España. Sicasí, les autoridaes nun dexaron que Megido, el so home y la so fía baxaren del barcu. En 1968 pudieron volver a España. El 1 de febreru de 1979, el so nome apaecía ente los maestros del Plan Nacional de 1931 que pasaben a formar parte del profesoráu d'EXB. El 20 de marzu de 1979, diéron-y plaza nel Colexu Nacional Mistu de Morea, xubilándose por enfermedá'l 8 de mayu de 1980. Finó en 1984.
Reconocencies En 2023, el conceyu d'Ayer instaló una placa conmemorativa na antigua escuela de Felechosa, na que estudió.
Referencies
Bibliografía Soler Gilabert, Alejandra (Valencia 2005) La vida es un río caudaloso con peligrosos rápidos. Al final de todo… sigo comunista, ISBN 8437073960.
Enllaces esternos
Ficha de Luzdivina Megido en PARES
Categoría:Maestres de la Segunda República Española Categoría:Persones d'Ayer